У Вікіпедыі ёсць артыкулы пра іншых асоб з прозвішчам Клебановіч. Мікалай Васільевіч Клебановіч (нар. 1 мая 1957, в. Грэск, Слуцкі раён, Мінская вобласць) — беларускі глебазнаўца, доктар сельскагаспадарчых навук (2004), прафесар (2016), дэкан геаграфічнага факультэта БДУ (2017).
Мікалай Васільевіч Клебановіч нарадзіўся 1 мая 1957 года ў вёсцы Грэск Слуцкага раёна Мінскай вобласці.
На выбар прафесіі вялікі ўплыў аказалі бацькі. Бацька — Васіль Фёдаравіч, большую частку жыцця працаваў у НДІ глебазнаўства і аграхіміі старэйшым навуковым супрацоўнікам, а з 1974 па 1977 гг. — загадчыкам сектара. Юны Мікалай бываў з бацькам на палявых пошуках, у школьныя гады захапляўся матэматыкай і геаграфіяй.
У 1974 г. скончыў СШ № 24 г. Мінска і паступіў на геаграфічны факультэт БДУ. Ужо ў студэнцкія гады з’явіліся першыя два артыкулы М. В. Клебановіча ў «Весніку БДУ» (у сааўтарстве з дацэнтам У. В. Сцяцко). На працягу трох гадоў быў старастай глебавага гуртка пры кафедры глебазнаўства БДУ. У 1979 г. атрымаў дыплом з адзнакай.
У 1980 годзе Мікалай Васільевіч паступіў у аспірантуру Беларускага НДІ глебазнаўства і аграхіміі. За гады навучання ў аспірантуры падрыхтаваў дысертацыю па спецыяльнасці «глебазнаўства» на тэму «Змена марфалагічных прыкмет, асноўных уласцівасцяў і ўрадлівасці дзярнова-падзолістых супяшчаных глеб у працэсе акультурвання», якую паспяхова абараніў 1 сакавіка 1984 года. Пасля заканчэння аспірантуры працаваў малодшым, старэйшым (са снежня 1985 г.), а затым і вядучым (з лютага 1991 г.) навуковым супрацоўнікам Беларускага НДІ глебазнаўства і аграхіміі. Асноўнай сферай навуковых інтарэсаў становіцца праблема аптымізацыі кіслотнасці глеб Беларусі, праводзяцца шматлікія палявыя і лабараторныя эксперыменты для падрыхтоўкі доктарскай дысертацыі.
У жніўні 1999 года перайшоў на працу ў Беларускі дзяржаўны ўніверсітэт на пасаду дацэнта кафедры глебазнаўства і геалогіі геаграфічнага факультэта.
У сакавіку 2004 г. абараніў дысертацыю па спецыяльнасці «аграхімія» на тэму «Сістэма падтрымліваючага вапнавання глеб Беларусі» (навуковы кансультант — акадэмік І. М. Багдзевіч).
З верасня 2004 года працаваў загадчыкам кафедры глебазнаўства і геалогіі БДУ, з 2010 года — кафедры глебазнаўства і зямельных інфармацыйных сістэм. У лютым 2017 г. прызначаны дэканам геаграфічнага факультэта.
Клебановіч М. В. з’яўляецца вядучым спецыялістам у галіне хімічнай меліярацыі глеб, антрапагеннай эвалюцыі глеб, ГІС-картаграфавання глеб, аграхіміі. Ім распрацаваны пытанні тэорыі, методыкі і практыкі вапнавання кіслых глеб у Беларусі, ён з’яўляецца адным з аўтараў дзеючай інструкцыі «Аб парадку вапнавання кіслых глеб сельскагаспадарчых зямель Рэспублікі Беларусь». Апошнія 10 гадоў распрацоўвае тэарэтычныя асновы рацыянальнага землекарыстання ў Беларусі, фарміруе глебазнаўчую навуковую школу ў БДУ. З’яўляецца членам ВМА ВНУ Рэспублікі Беларусь па геаграфічнай адукацыі.
З’яўляецца членам рэдкалегіі навуковых часопісаў: «Глебазнаўства і аграхімія», «Зямля Беларусі», «Веснік БДУ», "Аграхімічных веснік" (Масква).
Апублікаваў больш за 300 навуковых і вучэбных прац, у тым ліку звыш 40 навучальных дапаможнікаў і карт, больш за 100 артыкулаў у часопісах са спісу ВАК Беларусі. Без сааўтарства падрыхтавана 100 публікацый.
М. В. Клебановіч падрыхтаваў аўтарскія курсы лекцый па 5 дысцыплінах.
Пералік курсаў на геаграфічным факультэце:
За поспехі ў навуковай і педагагічнай дзейнасці быў двойчы ўдастоены Ганаровай граматы БДУ, занесены на дошку гонару БДУ (2013 год).
Поўны спіс публікацый: Электронная бібліятэка БДУ.