wd wp Пошук: ⬜

Мікалай Аляксандравіч Кавязін

Мікалай Аляксандравіч Кавя́зін[1] (15 верасня 1898 — 9 сакавіка 1950) — тэатральны рэжысёр, педагог, мастак. Заслужаны артыст Беларускай ССР (1949).

Біяграфія

Нарадзіўся ў горадзе Жлобін, у сям’і чыгуначніка. У 1905 годзе сям’я Кавязіных пераехала ў Мінск, дзе Мікалай скончыў школу і ў 1917 годзе паступіў у Мінскае камерцыйнае вучылішча[2]. З 1922 года акцёр і мастак у 2-й вандроўнай трупе Галоўпалітасветы[3]. У 1920-х гадах працаваў у чыгуначнай школе Мінска настаўнікам малявання, кіраваў драматычным аматарскім калектывам у клубе імя Леніна і драматычным гуртком на таварнай станцыі[2]. Арганізатар і мастацкі кіраўнік Тэатра юнага гледача БССР у 1931—1937 гадах. У 1938—1939 гадах Мікалай Кавязін на пасадзе мастацкага кіраўніка Полацкага калгасна-саўгаснага тэатра. З першых дзён Вялікай Айчыннай вайны Мікалай Кавязін служыў байцом на бронецягніку, удзельнічаў у дэсантных аперацыях[2].

З канца 1944 года Мікалай Кавязін прызначаны мастацкім кіраўніком Палескага абласнога тэатра імя Янкі Купалы[1], што аднавіў дзейнасць у Мазыры [2]. З 1945 года года мастацкі кіраўнік Бабруйскага абласнога тэатра, з 1947 года — Гродзенскага абласнога драматычнага тэатра.

Творчасць

Пастаноўкі Мікалая Кавязіна вызначаліся тэатральнасцю, глыбінёй раскрыцця сутнасці з’яў і характараў[3]. Частку сваіх пастановак ён афармляў як мастак.

Сярод пастановак:

«На штурм» Я. Маўра (1931);
«Наш» М. Зныка (1932);
«Ная» М. Зарэцкага (1936);
«Мікола Гоман» В. Сташэўскага (1936);
«Заложнікі» А. Кучара (1944);
«Лісічкі» Л. Хелман (1946);
«Сын» С. Паташова (1948);
«Шчасце» паводле П. Паўленкі (1949);
«Ракавая спадчына» Л. Шэйніна (1949);
«На дне» М. Горкага (1950).

Зноскі

1 2 Беларусь, 1995
1 2 3 4 Святлана Пятроўская Лёс, «пабудаваны» тэатрам // Газета «Культура», № 43 (1065) 27.10.2012 — 03.11.2012
1 2 БелЭн, 1998

Літаратура

Кавязін Мікалай Аляксандравіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 352. — 800 с. — 5 000 экз. — ISBN 985-11-0026-9.
Кавязін Мікалай Аляксандравіч // Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 1998. — Т. 7: Застаўка — Кантата. — С. 401. — 604 с. — 10 000 экз. — ISBN 985-11-0130-3 (т. 7), ISBN 985-11-0035-8.
Нефёд В. И. Николай Ковязин: Жизнь и творчество / В. И. Нефёд. — Мн., 1990. (руск.)

Спасылкі

Кавязін Мікалай Аляксандравіч на сайце анлайн-энцыклапедыі «Беларусь у асобах і падзеях»
Святлана Пятроўская Лёс, «пабудаваны» тэатрам // Газета «Культура», № 43 (1065) 27.10.2012 — 03.11.2012 г.