У Вікіпедыі ёсць артыкулы пра іншых асоб з прозвішчам Міцкевіч.
Марыя Міхайлаўна Міцкевіч (13 жніўня 1951, Мінск) — беларуская публіцыст, педагог. Даследчыца творчасці Якуба Коласа і Янкі Маўра.
Марыя Міцкевіч — унучка Якуба Коласа (па бацьку) і Янкі Маўра (па маці)[1]. Яе маці Наталля Іванаўна — дачка Янкі Маўра, а бацька Міхась Канстанцінавіч — сын Якуба Коласа.
Вучылася ў сярэдняй школе № 49 Мінска, затым у школе № 64 з паглыбленым вывучэннем англійскай мовы. У 1973 годзе скончыла матэматычны факультэт БДУ[2].
Працавала матэматыкам, малодшым навуковым супрацоўнікам у Інстытуце матэматыкі Акадэміі навук БССР (1973—1992), у Нацыянальным навукова-асветніцкім цэнтры імя Ф. Скарыны (1992, даследавала культурную спадчыну беларускай эміграцыі), выкладчыкам вышэйшай матэматыкі ў Інстытуце кіравання і прадпрымальніцтва.
Была дэпутатам Першамайскага раённага Савета г. Мінска, членам камісіі па культуры, адукацыі і справах моладзі (1990—1995). Ініцыятар стварэння і нязменны старшыня Дзіцячага фонду духоўнага і культурнага адраджэння «Сакавік» (1993). Бярэ ўдзел у працы іншых грамадскіх арганізацый — БНФ «Адраджэньне» (з 1989), Аб’яднанні беларусаў свету «Бацькаўшчына» (з 1990), Грамадскага навукова-аналітычнага Цэнтра «Беларуская перспектыва»(1995—1999), Міжнароднага фонду Якуба Коласа (з 1997), Грамадствы «Беларусь — Ірландыя» (з 1998)[3].
Выходзячы замуж, захавала прозвішча дзеда — класіка беларускай літаратуры Якуба Коласа (Канстанціна Міхайлавіча Міцкевіча). Актыўна займаецца папулярызацыяй яго творчасці: публікацыі ў перыядычным друку, лекцыі, сустрэчы. Замужам, трое дзяцей. Выкладае ў Мінскім інстытуце кіравання[4].