Гібіскус (Hibiscus) — род кветкавых раслін сямейства Мальвавыя (Malvaceae).
Вечназялёныя або лістападныя дрэвы і хмызнякі, шматгадовыя і аднагадовыя травы. Лісце пераважна пальчаталопасцевае, кветкі звычайна буйныя, ярка афарбаваныя.
Каля 250 відаў, распаўсюджаныя пераважна ў трапічных, радзей ва ўмераных абласцях. Многія віды гібіскуса дэкаратыўныя; вырошчваюцца ў аранжарэях, пакоях і ў адкрытым грунце. З дравяністых відаў найбольш вядомыя кітайская ружа (Hibiscus rosa-sinensis), — пакаёвая расліна і гібіскус сірыйскі (Hibiscus syriacus), шырока культывуецца ў Крыме, на Каўказе.