Гу́йка[1] — рака ў Беларусі, у Мінскім і Маладзечанскім раёнах Мінскай вобласці, у басейне Нёмана.
Даўжыня ракі 19 км, у тым ліку 3 км на тэрыторыі Маладзечанскага раёна[2]. Сярэдні нахіл воднай паверхні 0,33 м/км. Плошча вадазбору 98 км².
Пачынаецца каля вёскі Шчадроўшчына Мінскага раёна[2], за 2 км у напрамку на ўсход да вёскі Новы Двор[1]. Ад сутокаў Гуйкі з Вязынкай каля гарадскога пасёлка Радашковічы ўтвараецца рака Рыбчанка. Вадазбор на паўночна-заходніх схілах Мінскага ўзвышша, лясістасць 35 %, пад ворывам 45 % тэрыторыі. На працягу 4,8 км каналізаваная: ад вёскі Рагава на паўночны захад (2,6 км) і на паўднёвы ўсход (2,2 км).
Апроч як Гуйкай раку ў мінулым называлі Чорнай[3].
Каля ракі населеныя пункты Пухлякі, Новы Двор (Шаршунскі сельсавет), Збаравічы, Рагава.
Паводле Казіміра Бугі, назва ракі балцкая, дэмінутыў ад зыходнай назвы Guja, якая звязаная з латышскім гідронімам Gauja.[4] У сваю чаргу, апошні гідронім лінгвіст Аляксандрас Ванагас, следам за мовазнаўцамі Бронюсам Савукінасам і Янісам Эндзелінсам, тлумачыў як «хуткая, шпаркая».[5]