Вячка Святаславіч (? — пасля 1167) — князь з Віцебскай галіны Ізяславічаў Полацкіх.
Сын Святаслава-Георгія Усяславіча, малодшы брат Васількі і, адпаведна, брат Прадславы. На думку А. Рапава, трымаў Усвяцкі ўдзел Віцебскай воласці, а ў 1162 заняў і Віцебскі сталец[1]. Згадваецца разам з неназванай імем жонкай у «Жыціі Еўфрасінні Полацкай» каля 1167 года, калі праводзіў сястру ў паломніцтва да Святых Мясцін. Пры гэтым Еўфрасіння пастрыгла дзвюх яго дачок, сваіх пляменніц — Кір’яну (у інацтве Агафію) і Вольгу (у інацтве Еўфімію). Апошні раз згадваецца ў тым жа 1167 годзе, калі разам з Валадаром Глебавічам дапамог наўгародцам паслаць да Кіева вестку пра напад на іх смаленцаў, суздальцаў і палачанаў[2].
М. Баўмгартэн памылкова лічыў Вячку, згаданага «Жыціем Еўфрасінні Полацкай» сынам Расціслава Усяславіча[3]. Т. Васілеўскі памылкова атаясняў Вячку Святаславіча з Вячкам Кукенойскім[4], які, як заўважыў Л. Аляксееў, загінуў у 1224 годзе і не мог быць братам Еўфрасінні[5].