Бру́на Максі́мавіч Пантэко́рва (22 жніўня 1913, Піза, Італія — 26 верасня 1993) — савецкі і расійскі фізік, адзін з пачынальнікаў эксперыментальных даследаванняў нейтрына. Акадэмік АН СССР (1964; член-карэспандэнт 1958).
Скончыў Рымскі ўніверсітэт (1933), дзе працаваў пад кіраўніцтвам Э. Фермі. З 1936 у навукова-даследчых установах Францыі, ЗША, Канады і Англіі. З 1950 у Інстытуце ядзерных праблем АН СССР, з 1956 у Аб’яднаным інстытуце ядзерных даследаванняў (г. Дубна).
Навуковыя працы па ядзернай фізіцы, фізіцы высокіх энергій, фізіцы нейтрына і астрафізіцы. Выканаў даследаванні па нейтроннай фізіцы і прапанаваў метад нейтроннага каратажу[ru] для пошукаў нафты (1941). Заклаў асновы радыехімічнага метаду рэгістрацыі сонечных нейтрына[en] (1946). Выказаў гіпотэзу аб магчымасці асцыляцый нейтрына (1957—1958). Прапанаваў эксперымент на паскаральніках пратонаў па пошуку адрознення мюоннага нейтрына ад электроннага (1959). Даследаваў ролю нейтрына ў працэсах эвалюцыі зорак, што спрыяла стварэнню нейтрыннай астрафізікі.