У Вікіпедыі ёсць артыкулы пра іншых асоб з прозвішчам Хрусталёў.
Бары́с Міха́йлавіч Хрусталё́ў (нар. 21 ліпеня 1947, Гомель) — беларускі вучоны ў галіне машынабудавання. Акадэмік Нацыянальнай акадэміі навук Беларусі (2009; член-карэспандэнт з 2004 года), доктар тэхнічных навук (1998), прафесар (1991). Заслужаны работнік адукацыі Рэспублікі Беларусь (1995). Навуковы каардынатар Дзяржаўнай праграмы фундаментальных даследаванняў «Будаўніцтва і архітэктура», намеснік старшыні Савета рэктараў вышэйшых навучальных устаноў Рэспублікі Беларусь, галоўны рэдактар Міжнароднага навукова-тэхнічнага часопіса «Энергетыка», член Нацыянальнага Алімпійскага Камітэта Беларусі. Ганаровы прафесар Гродзенскага дзяржаўнага ўніверсітэта імя Янкі Купалы (2009).
У 1970 годзе скончыў Беларускі політэхнічны інстытут. З 1976 года працаваў у Беларускім політэхнічным інстытуце асістэнтам, у 1983—1998 гадах — загадчык кафедры, у 1987—1997 гадах — прарэктар па навучальнай працы. У 1997—2000 гадах — першы намеснік Міністра адукацыі Рэспублікі Беларусь. У 2000—2017 гадах — рэктар Беларускага нацыянальнага тэхнічнага ўніверсітэта. У 2004—2008 гадах — намеснік старшыні Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і гуманітарных пытаннях.
Навуковыя працы ў галіне тэорыі аэрадынамікі дысперсных патокаў, метадалогіі праектавання апаратаў і сістэм, якія дазваляюць выкарыстоўваць рэсурсазберагальныя тэхналогіі ачысткі вентыляцыйных выкідаў, метадаў праектавання і разліку сушыльных сістэм, стварэнне неабходнага мікраклімату для жыццядзейнасці чалавека і неабходных параметраў для забеспячэння якаснага правядзення тэхналагічнага працэсу на прадпрыемствах машынабудаўнічай, будаўнічай і іншых галін. Пад яго навуковым кіраўніцтвам створаны высокапрадукцыйныя аўтаматызаваныя сістэмы пнеўматранспарту матэрыялаў, машын і апараты для ачысткі тэхналагічных выкідаў, рэсурсазберагальныя экалагічна чыстыя тэхналогіі ў машынабудаванні і будаўніцтве.
Аўтар больш за 150 навуковых прац, у тым ліку, 3 манаграфій, 3 падручнікаў, 10 вынаходніцтв.