Аўра́н ле́кавы[3] (Gratiola officinalis) — від травяністых раслін з роду Аўран (Gratiola) сямейства Залознікавыя (Scrophulariaceae).
Шматгадовая травяністая расліна з прамым або прыўзнятым сцяблом вышынёй 15—60 см і паўзучым карэнішчам. Лісце лінейна-ланцэтнае. Кветкі белыя, званочкавыя, адзіночныя, у пазухах лісця, на даўгіх кветаножках. Цвіце ў маі—чэрвені. Плод — каробачка.
Расліна ядавітая.
Аўран лекавы распаўсюджаны на тэрыторыі Еўразіі і Паўночнай Амерыкі. На тэрыторыі Беларусі сустракаецца пераважна ў паўднёва-ўсходніх раёнах. Расце на балотах, заліўных лугах, па вільготных пясчаных берагах вадаёмаў.