У Вікіпедыі ёсць артыкулы пра іншых асоб з прозвішчам Саламонаў. Аляксей Андрэевіч Саламо́наў[2] (нар. 14 жніўня 1925, в. Кледнявічы, Дрыбінскі раён, Магілёўская вобласць) — беларускі геадэзіст. Доктар тэхнічных навук (1970), прафесар (1970). Член Беларускага саюза журналістаў.
Нарадзіўся ў вёсцы Кледнявічы Дрыбінскага раёна Аршанскай акругі. Удзельнік Вялікай Айчыннай вайны, старшы лейтэнант. Скончыў Беларускую дзяржаўную сельскагаспадарчую акадэмію ў 1951 годзе, дзе і працаваў з 1955 года (1955—1974 і 1997—2003 гадах прафесар кафедры геадэзіі і фотаграмметрыі, у 1970—1974 — загадчык кафедры). У 1954 годзе скончыў аспірантуру пры Беларускім політэхнічным інстытуце. З 1974 года ў Беларускім тэхналагічным універсітэце (1974—1991 гадах загадчык кафедры інжынернай геадэзіі, 1991—1996 — загадчык універсітэта беларускай мовы, гісторыі і культуры). З 1996 года ў выдавецтве «Беларуская Энцыклапедыя». З 1977 года прафесар БДСГА і адначасова ў 1997—2004 гадах прафесар-кансультант інстытутаў «Белдзіпразем» і «Белгеадэзія».
Навуковыя працы ў галіне пабудовы і матэматычнай апрацоўкі геадэзічных сетак, аўтаматызацыі геадэзічных і тапаграфічных работ, навукова-даследчай работы студэнтаў, па праблемах адукацыі, інтэлекту і дэмакратычнага філасофска-сацыялагічнага напрамку. Прапанаваў метады стварэння і апрацоўкі геадэзічнай апоры, агульназямельнага кадастру і землеўпарадкавання, дэмаркацыі дзяржаўнай мяжы. Удзельнічаў у стварэнні астранома-геадэзічнай сеткі ў Беларусі і прылеглых да яе тэрыторый, а таксама ў Егіпце. Аўтар падручнікаў і навучальных дапаможнікаў для вышэйшых навучальных устаноў.