Алена Андрэеўна Кіш (1889 ці 1896 — 1949) — беларуская мастачка-прымітывіст са Слуцкага раёна, аўтар маляваных дываноў.
Мастачка-вандроўніца, значную частку жыцця хадзіла з вёскі ў вёску і малявала дываны, часам за калавак хлеба. Апошні перыяд жыла ў сваёй малодшай сястры. Скончыла жыццё самагубствам, кінуўшыся ў раку. Значная калекцыя твораў захоўваецца ў архівах Заслаўскага гісторыка-культурнага музея. Працы Алены Кіш, як і звесткі пра яе жыццё, былі сабраныя праз значны час пасля яе смерці па ініцыятыве мастака Уладзіміра Басалыгі, які бачыў размаляваныя ёю дываны ў дзяцінстве.
Дываны з казачна-экзатычнымі сюжэтамі («Ліст да каханага», «Дзева на водах», «Рай», «У райскім садзе» і інш. прадстаўлены ў шматлікіх варыянтах[1]), адметныя кампазіцыйным майстэрствам, своеасаблівым бачаннем і ўнікальнай вобразнасцю. Ёсць меркаванне, што змест твораў Алены Кіш звязаны з біяграфіяй мастачкі і яўленнем пра «жаночую долю» і мару пра «рай»[2]. Блізкасць да мясцовай традыцыйнай размалёўкі выявілася ў дэкаратыўнасці прапрацаваных дэталяў, лакальнасці колераў, шырокім выкарыстанні раслінных элементаў, акаймоўцы дываноў.
У снежні 2013 года адбылася выстаўка маляваных дываноў Алены Кіш «На шчасце» са збору Заслаўскага музея ў Мастацкай галерэі Міхаіла Савіцкага. Выстаўка была падрыхтавана мастацтвазнаўцам Таццянай Бембель разам з беларускім мецэнатам Канстанцінам Цэрэтэлі[3]. Адкрываў вернісаж дырэктар гісторыка-культурнага музея-запаведніка «Заслаўе», мастацтвазнаўца Мікалай Паграноўскі[4].
У 1996 годзе, да 100-годдзя з дня нараджэння мастачкі, РУП «Белпошта» выпусціла памятны мастацкі канверт з арыгінальнай маркай.
У 2010-м годзе на кінастудыі «Беларусьфільм» была створана дакументальная стужка пра лёс мастачкі Алены Кіш «Маляваны рай»[5], рэж. Галіна Адамовіч.
Алена Кiш сярод гераiнь аповесцi «Русалкi клiчуць», якую напісала Зараслава Камінская.