Азарэвічы (Азарэвічавы) — сям’я беларускіх і рускіх акцёраў 18-19 стагоддзяў.
Прадстаўнікі сям’і
Пелагея (па сцэне Жывакіна; ?, Шклоў — ?) — артыстка балета. Вучылася ў балетмайстра Марыядзіні. Прымадонна балета Шклоўскага тэатра Зорыча (да 1799 года прыгонная «дансёрка»), выконвала асноўныя партыі. Адпушчаная на волю, з 1800 года выступала на пецярбургскай, потым да 1812 года на маскоўскай сцэне, вядомая пад прозвішчам мужа мастака-дэкаратара Жывакіна; маці вядомага рускага драматычнага акцёра В. І. Жывакіні.
Кацярына Лук’янаўна (?, Шклоў — пасля 1870) — артыстка балета. Пляменніца Пелагеі. Вучаніца балетмайстра М. Пранчынскага. Да 1799 года вядучая танцоўшчыца (прымадонна) шклоўскага балета. У 1800 годзе (у ліку 14 прыгонных акцёраў са Шклова) перададзена дырэкцыі Пецярбургскіх імператарскіх тэатраў. У 1802 годзе адпушчана на волю. Асаблівым поспехам карысталася на пецярбургскай сцэне ў 1800—1801 гадах.
Пазашлюбныя дачкі Кацярыны Лук’янаўны і дырэктара Імператарскіх тэатраў А. А. Майкава:
Надзея Апалонаўна (па сцэне Азарэвіч 1-я, па мужу Навіцкая; каля 1802, Санкт-Пецярбург — ?) — артыстка балета і драмы. Дачка Кацярыны Лук’янаўны Азарэвіч. Вучылася ў імператарскім тэатральным вучылішчы ў балетным класе і ў т.зв. маладой трупе драматурга і тэатральнага дзеяча А.Шахаўскога. У 1821—1827 гадах выступала на пецярбургскай сцэне. Славілася як першая пантамімная танцоўшчыца (у балетах Агюста і Ш.Дзідло).
Марыя Апалонаўна (па сцэне Азарэвіч 2-я; 1804, Санкт-Пецярбург — 14 лістапада1888) — драматычная актрыса. Дачка Кацярыны Лук’янаўны Азарэвіч. Вучаніца Шахаўскога і К.Сямёнавай. У 1821—1843 гадах выступала на пецярбургскай, потым — маскоўскай сцэне. Іграла камедыйныя (у п’есах І.Крылова, Шахаўскoгa, Р.Зотава) і трагедыйныя (у п’есах У.Озерава, Расіна, Вальтэра) ролі. Першая выканаўца ролі Лізы ў спектаклі «Гора ад розуму» А.Грыбаедава (паст. 1831).