Hyundai Motor Company (Хёндэ; па-карэйску: 현대자동차 주식회사, KSE:005380, LSE: HYUD ) — найбуйнейшы аўтавытворца ў Паўднёвай Карэі і сёмы ў свеце.
Кампанія ўваходзіць у Hyundai Kia Automotive Group.
Заснаваная ў 1967 годзе, уваходзіла ў склад (чэболь) Hyundai, з якога была вылучаная ў 2003 годзе. У 1998 годзе Hyundai паглынула карэйскую аўтамабілебудаўнічую кампанію Kia Motors. У 2000 годзе кампанія склала стратэгічны альянс з DaimlerChrysler.
Hyundai (кар. 현대, 現代) азначае «сучаснасць». Правільная транскрыпцыя — Хёндэ. Часта сустракаюцца таксама хібныя напісанні «Хюндай», «Хендай», «Хундай».
Ва Ульсане — найбуйнейшы вытворчы комплекс у Паўднёвай Карэі і трэці па велічыні ў свеце[3].
Комплекс складаецца з 5 заводаў, здольных вырабляць большасць кампанентаў (ад ліцейнага да завода па вытворчасці рухавікоў), і займае плошчу звыш 5 мільёнаў квадратных метраў. Таксама ўключае выпрабавальны палігон. Для лагістыкі мае ўласны прычал, адкуль аўтамабілі адпраўляюцца на рынкі па ўсім свеце. Усяго ва Ульсане можа выпускацца каля 1,53 мільёна аўтамабіляў у год.
Завод працуе з 1968 года, калі пачалася вытворчасць аўтамабіляў Ford па ліцэнзіі. У 1975 годзе з канвеера сышоў першы самастойны аўтамабіль маркі — Hyundai Pony.
Дата пабудовы | 1968 |
---|---|
Лакацыя | Ульсан, Паўднёвая Карэя |
Агульная плошча | 5 050 000 кв. м. |
Колькасць супрацоўнікаў | 34 000 |
Вытворчая магутнасць | 1 530 000 машын у год |
Прадукцыя | Genesis, Ioniq |
Hyundai Motor Manufacturing Czech — адзіны завод маркі ў Еўрапейскім Саюзе. Размешчаны ў Нашовіцах (Чэхія). Пабудова пачалася ў 2007 годзе. Вытворчасць пачалася ў лістападзе 2008 года. На заводзе працуе больш за 3100 супрацоўнікаў, выпускаецца да 1400 аўтамабіляў штодзень.
У 2013 годзе з канвеера сышоў мільённы аўтамабіль выраблены на заводзе HMMC, двухмільённы — у 2016, трохмільённы — у 2019 годзе.
У 2021 годзе выраблена 275 тысяч аўтамабіляў. 70% вытворчасці склала мадэль Tucson, 20% — i30, 2% — i30N і 8% прыпала на электрамабіль Kona Electric[4].
14 лістапада 2022 года выпусцілі чатырохмільённы аўтамабіль. Юбілейным стаў красовер Hyundai Tucson N Line[5].
У 2003 годзе заводы канцэрна Hyundai сабралі 92,5 тыс. лёгкіх і 144,8 тыс. сярэдніх і цяжкіх грузавікоў.