Чакавец
Ча́кавец (харв.: Čakovec) — горад у Харватыі, у паўночнай частцы краіны. Адміністрацыйны цэнтр і найбуйнейшы горад Меджымурскай жупаніі. Насельніцтва — 15 790 чалавек (2001).
Геаграфія і транспарт
Чакавец размешчаны ў самым паўночным рэгіёне краіне — міжрэччы рэк Дравы і Муры, вядомым як Меджымур’е. Другі з самых паўночных гарадоў краіны пасля горада Мурска-Срэдзішчэ.
За 7 кіламетраў на захад і за 20 кіламетраў на поўнач ад горада праходзіць граніца са Славеніяй, за 20 кіламетраў на ўсход — граніца з Венгрыяй.
За 12 кіламетраў на поўдзень ад Чакаўца знаходзіцца горад Вараждзін, за 15 кіламетраў на поўнач — Мурска-Срэдзішчэ.
Праз горад праходзіць аўтамабільная шаша, якая вядзе з Венгрыі ў Вараждзін і Заграб, а таксама некалькі чыгунак, што вядуць у суседнія гарады Харватыі, Венгрыі і Славеніі. У трох кіламетрах ад горада знаходзіцца невялікі аэрапорт, здольны прымаць малыя самалёты.
Гісторыя
У рымскія часы на месцы сучаснага горада размяшчаўся ўмацаваны лагер Акуама.
Упершыню пад сваёй сучаснай назвай горад згаданы ў 1328 годзе. Назва паходзіць ад прозвішча венгерскага князя Дзмітрыя Чакі, які пабудаваў у XIII стагоддзі драўляную вежу, што атрымала яго імя, якое затым перайшло на ўвесь горад.
У 1466 годзе ўлада над горадам перайшла да знатнага княжацкага роду Зрынскіх, пасля чаго Чакавец пачаў бурна развівацца. У 1579 годзе Чакавец атрымаў гарадскія прывілеі.
У 1738 годзе горад быў разбураны землетрасеннем, а ў 1741 годзе пацярпеў ад вялікага пажару. У 1848 годзе быў далучаны да Харватыі, якая мела аўтаномію ў складзе Аўстра-Венгрыі.
Пасля Першай сусветнай вайны разам з усёй Харватыяй Чакавец увайшоў у склад Каралеўства сербаў, харватаў і славенцаў, а пазней — у склад Югаславіі. У 1941—1945 гадах быў акупаваны венгерскай арміяй. З 1991 года — у складзе незалежнай Харватыі.
Дэмаграфія
Паводле перапісу 2001 года насельніцтва горада складае 15 790 чалавек, разам з прыгарадамі насельніцтва агламерацыі — 30 455 чалавек. Пераважная большасць насельніцтва — харваты (93 %), самай буйной нацыянальнай меншасцю з’яўляюцца цыгане — 3,6 %.
Эканоміка
Чакавец — развіты індустрыяльны горад. Галоўныя галіны прамысловасці — вытворчасць тэкстылю, абутку, металаапрацоўка, паліграфія, харчовая і хімічная прамысловасць.
Славутасці
- Замак Зрынскіх — добра захаваны замак сям’і Зрынскіх. Цяпер у ім размешчаны музей Меджымур’я.
- Сецэсійны палац — палац у стылі венскага сецэсіёну.
- Храм Св. Мікалая.
Гарады-партнёры
Спасылкі
На Вікісховішчы ёсць медыяфайлы па тэме Чакавец- Афіцыйны сайт горада
Катэгорыя·Вікіпедыя·Артыкулы з пераазначэннем значэння з Вікідадзеных
Катэгорыя·Гарады Харватыі
Category:%D0%A1%D1%82%D0%B0%D1%80%D0%BE%D0%BD%D0%BA%D1%96 %D0%B7 %D0%BA%D0%B0%D1%80%D1%82%D0%B0%D0%BC%D1%96
Катэгорыя·Населеныя пункты паводле алфавіта