Цэратадон пурпурны[1] (Ceratodon purpureus) — від брыевых імхоў з роду Цэратадон (Ceratodon) сямейства Дытрыхавыя (Ditrichaceae).
Шматгадовыя двухдомныя лістасцябловыя расліны. Утвараюць дзярнінкі зялёнага або зялёна-карычневага, часам чырванаватага колеру. Сцябло прамастойнае, вышынёй 1—3[2] см, галінастае, густа пакрытае лісцем. Лісце ланцэтнае, завостранае, з адагнутым уверх краем. Каробачка нахіленая, амаль гарызантальная, на пурпурна-чырвонай бліскучай ножцы, бліскучая, чырвона-бурага колеру. Сухая каробачка моцна баразнаватая. Каўпачок шапкападобны. Споры (10—14) амаль гладкія[2].
Сустракаецца паўсюдна, у тым ліку і на тэрыторыі Беларусі. Расце на аголеных глебах, на вогнішчах, каменні, на схілах узгоркаў, каля дарог, драўляных дахах і загнілай драўніне[2].