Жан Фрэдэрык Базіль, больш вядомы як Фрэдэрык Базіль (фр.: Jean Frédéric Bazille, 1841—1870) — французскі жывапісец, адзін з заснавальнікаў імпрэсіянізму.
Фрэдэрык Базіль нарадзіўся 6 снежня 1841 года ў французскім горадзе Манпелье (дэпартамент Эро), у буржуазнай пратэстанцкай сям’і. Быў сынам заможнага вінароба. Атрымаў добрую адукацыю. У ліцэйскія гады наведваў музей Фабра.
Захапіўся жывапісам пад уздзеяннем карцін Эжэна Дэлакруа і Гюстава Курбэ.
У 1859 годзе пачаў вывучаць медыцыну. У 1862 г. пераехаў у Парыж, каб прадоўжыць навучанне. Вучыўся ў майстэрні Шарля Глейра (1862—1864), дзе пазнаёміўся з Клодам Манэ. У сталіцы сустрэў Агюста Рэнуара і сур’ёзна пачаў займацца выяўленчым мастацтвам. У перыяд з 1862 па 1864 год вучыўся ў майстэрні Шарля Глейра. Быў блізка знаёмы з Полем Сезанам, Арманам Гіёйменам, Альфрэдам Сіслеем, знаходзіўся ў сяброўскіх адносінах з Агюстам Рэнуарам і Клодам Манэ.
Базіль піша карціны для Салона і для фамільнага маёнтка ў ваколіцах Манпелье («Ружовая сукенка», каля 1864; «Сям’я мастака на тэрасе каля Манпелье», 1867; «Від на вёску», 1868).
У час Франка-прускай вайны (1870—1871) Базіль пайшоў добраахвотнікам на фронт. Быў забіты 28 лістапада 1870 г. у баі ў Бургундскім лесе пад Бон-ла-Роланд.