Феліцыян Славай-Складкоўскі (польск.: Felicjan Sławoj Składkowski; 9 чэрвеня 1885 — 31 жніўня 1962 года) — польскі палітык, прэм’ер-міністр Польшчы, генерал Войска Польскага, масон, доктар медыцыны.
Удзельнік польска-бальшавіцкай вайны, прыхільнік рэжыму Санацыі, пасля майскага перавароту ўпаўнаважаны па справах сталічнага горада Варшавы (з 13 мая па 1 кастрычніка 1926 года). Тройчы міністр унутраных спраў (з 2 кастрычніка 1926 па 7 снежня 1929, з 3 чэрвеня 1930 па 23 чэрвеня 1931 і з 15 мая 1936 па 30 верасня 1939 года), другі намеснік міністра ваенных спраў і кіраўнік адміністрацыі арміі (з 24 чэрвеня 1932 па 15 мая 1936 года). прэм’ер-міністр Польшчы (з 15 мая 1936 па 30 верасня 1939 года). З пачаткам Другой сусветнай вайны інтэрнаваны ў Румыніі, затым знаходзіўся ў Турцыі і Палесціне. З 1947 года жыў у Вялікабрытаніі.