wd wp Пошук: ⬜

Феадор II Палеалог

Феадор II Палеалог (грэч.: Θεόδωρος Β΄ Παλαιολόγος) (1396—21 чэрвеня 1448) — дэспат Марэі ў 1408—1443 гадах.

Паходжанне

Феадор II Палеалог быў сынам візантыйскага імператара Мануіла II Палеалога і яго жонкі Алены Драгаш. Яго дзедам па матчынай лініі быў сербскі цар Канстанцін Драгаш. Братамі Феадор былі імператары Іаан VIII Палеалог і Канстанцін XI Палеалог, дэспаты Марэі Дзімітрый і Тамаш Палеалогі, а таксама дэспат Фесаліі Андронік Палеалог.

Біяграфія

Феадору было ўсяго дванаццаць гадоў, калі бацька, абвясціў яго дэспатам Марэі ў 1407 годзе, замест памерлага Феадора I Палеалога. Да паўналецця Феадора адміністрацыйнымі і палітычнымі справамі Марэі кіраваў яго бацька Мануіл II Палеалог.

У пачатку кіравання Феадор II увесь час вёў войны з лацінскімі дзяржавамі Грэцыі, спрабуючы захапіць увесь Пелапанес. Таксама дэспат ваяваў з Венецыянскай рэспублікай, якая перашкодзіла яго спробе заваяваць Патры.

Палітыка Феадора рэзка змянілася пасля яго шлюбу з італьянскай дваранкай Клеофой Малатэстай. Гэты шлюб арганізаваў Папа Рымскі Марцін V, які стаў саюзнікам дэспата Марэі. У лісце, адрасаваным Феадору пасля смерці Мануіла II, Марцін V заве яго імператарам Канстанцінопаля, хоць насамрэч карона перайшла да яго старэйшага брата Феадора, Іаана VIII Палеалога.

Неўзабаве пачалася вайна з царом эпірскім Карлам I Тока. Феадор папрасіў дапамогі ў брата Іаана VIII. Імператар выслаў падмацаванне на чале са сваім братам Канстанцінам Палеалогам, які ў 1428 годзе стаў дэспатам Марэі сумесна з Феадорам II. Аб’яднанымі сіламі браты разграмілі эпірскі флот у 1427 і заваявалі Патры ў 1430 годзе.

Аднак, у 1438 годзе, на час падарожжа ў Фларэнцыю, Іаан VIII прызначыў кіраўніком Візантыі Канстанціна, што падкрэслівала тое, што Іаан абраў яго сваім спадчыннікам. Але Канстанцін быў малодшым братам Феадора II, і наступныя некалькі гадоў браты спрачаліся за права на трон бяздзетнага Іаана VIII. У выніку, у 1443 годзе Феадор пайшоў на кампраміс, і аддаў свае правы на прастол у абмен на частку Марэі, якая належала Канстанціну і прыгарад Канстанцінопаля — Сіліўры.

Феадор II Палеалог памёр у Сіліўры ў 1448 годзе ад чумы.

Сям’я

Ад сваёй жонкі, Клеофы Малатэсты, Феадор II меў прынамсі адну дачку:

Алена Палеалог (1428—11 красавіка 1458) — жонка кіпрскага караля Іаана II .

Таксама вядома, што Феадор II меў сына ад карміцелькі:

Томас Эмануіл П’етра Палеалог — міграваў на Кіпр разам з сястрой.

Зноскі

Літаратура

Oxford Dictionary of Byzantium. — Oxford University Press, 1991.
Joseph Freiherr von Hammer-Purgstall. Geschichte des Osmanischen Reiches.
Edward Gibbon. The History of the Decline and Fall of the Roman Empire.
George Sphrantzes. The Fall of the Byzantine Empire.
Ferdinand Gregorovius. Geschichte der Stadt Rom im Mittelalter. — Munchen, 1988. — ISBN 3-406-07107-4.

Спасылкі

Selimbria and Mystra (нявызн.) (недаступная спасылка). Архівавана з першакрыніцы 3 жніўня 2012.