wd wp Пошук: ⬜

Уладзімір Антонавіч Тамашэвіч

У Вікіпедыі ёсць артыкулы пра іншых асоб з прозвішчам Тамашэвіч. Уладзімір Антонавіч Тамашэвіч (22 лютага 1899, Мінск — 8 кастрычніка 1983) — беларускі савецкі эканаміст. Кандыдат эканамічных навук (1953). Рэктар Беларускага дзяржаўнага ўніверсітэта з 1946 па 1949 год.

Біяграфія

Нарадзіўся 22 лютага 1899 года ў Мінску ў рабочай сям’і. З пятнаццаці гадоў працаваў наборшчыкам у друкарні Лібава-Роменскай чыгункі. У 1918 годзе ўступіў у Чырвоную Армію.

У 1921 годзе быў накіраваны ў Камуністычны ўніверсітэт імя Я. М. Свярдлова ў Маскве, які скончыў у 1924 годзе па спецыяльнасці «Адміністрацыйнае права». Да 1928 года працаваў прапагандыстам.

З 1929 па 1932 год працаваў намеснікам рэктара па навучальнай частцы і загадчыкам кафедры савецкай эканомікі Беларускага дзяржаўнага ўніверсітэта. У 1933—1934 гадах працаваў намеснікам начальніка аддзела прапаганды і агітацыі Гомельскага гаркама УКП(б) Беларусі. У 1938—1941 гадах працаваў загадчыкам кафедры палітычнай эканоміі Усесаюзнага завочнага фінансава-эканамічнага інстытута (Масква). Дацэнт з 1939 года.

У 1941—1942 гадах знаходзіўся на фронце, у 1942 годзе быў паранены, лячыўся ў шпіталі.[1]

У 1942—1944 гадах працаваў дацэнтам кафедры палітэканоміі Маскоўскага інстытута інжынераў транспарту, з 1944 па 1946 год быў сакратаром Мінскага абкама КП(б) Беларусі, а таксама загадчыкам кафедры палітэканоміі Мінскага педагагічнага інстытута.

З 1 снежня 1946 да лютага 1949 года працаваў рэктарам Беларускага дзяржаўнага ўніверсітэта, з 1948 па 1965 год — загадчыкам кафедры палітэканоміі. Тамашэвіч стаў першым рэктарам БДУ паходжаннем з горада, а не з вёскі. Спрыяў таму, што БДУ атрымаў права абароны кандыдацкіх дысертацыі па палітэканоміі.

У 1949—1950 гадах быў сакратаром ЦК КП(б) Беларусі. У 1953 годзе абараніў кандыдацкую дысертацыю на тэму «Сацыялістычная індустрыялізацыя БССР». З 1954 па 1956 год праходзіў дактарантуру ў Маскве. У 1965 годзе сышоў у адстаўку і да пенсіі (1974) працаваў дацэнтам кафедры палітэканоміі БДУ.

Пахаваны на Усходніх могілках Мінска.

Навуковая дзейнасць

Даследаваў працэс індустрыялізацыі народнай гаспадаркі Беларусі. Апублікаваў каля 30 навуковых артыкулаў, падрыхтаваў 10 кандыдатаў эканамічных навук.

Узнагароды і прэміі

Ордэн Леніна

Бібліяграфія

О некоторых вопросах экономики Белоруссии в дореволюционный период // Учёные записки БГУ. Мн., 1957.
Социалистическая индустриализация в БССР в период первой пятилетки // Сборник статей по политической экономии. Мн., 1957.
Народное хозяйство БССР (1920—1927) // Сборник статей по экономическим вопросам. Мн., 1962.
Социально-экономические результаты социалистических преобразований экономики БССР (1928—1937) // Об экономических проблемах перехода от социализма к коммунизму. Мн., 1961.

Зноскі

↑ Уладзімір Антонавіч Тамашэвіч — Гісторыя БДУ