Плясе́цкае — возера ў Петрыкаўскім раёне Гомельскай вобласці Беларусі, на мяжы з Калінкавіцкім раёнам, за 34 км на паўночны ўсход ад горада Петрыкаў, за 2,2 км на ўсход ад вёскі Церабаў. Адносіцца да басейна ракі Трэмля.
Плошча паверхні возера каля 0,22 км², даўжыня 0,61 км, найбольшая шырыня 0,51 км. Найбольшая глыбіня 1,5 м, сярэдняя 0,9 м. Даўжыня берагавой лініі 1,81 км. Аб’ём вады 0,20 млн м³.
Размешчана на ўскрайку асушанага балотнага масіву. Схілы катлавіны маюць вышыню да 2 м. Берагі нізкія, пераважна забалочаныя, параслі хмызняком, на паўднёвым захадзе лесам. Дно выслана глеем і сапрапелем. Зарастае істотна. На паўднёвым усходзе ўпадае ручай. На захадзе пратокай злучана з канавай Плясецкая.
У возеры водзяцца акунь, плотка, шчупак, лешч і іншыя віды рыб.