У Вікіпедыі ёсць артыкулы пра іншых асоб з прозвішчам Жданаў.
Павел Ільіч Жданаў (1903-1986) — падпалкоўнік Рабоча-сялянскай Чырвонай Арміі, удзельнік Вялікай Айчыннай вайны, Герой Савецкага Саюза (1943).
Павел Жданаў нарадзіўся 16 студзеня 1903 года ў горадзе Слонім (цяпер — Гродзенская вобласць Беларусі). Пасля заканчэння рабфака знаходзіўся на розных камсамольскіх пасадах. У 1925—1938 гадах праходзіў службу ў Рабоча-сялянскай Чырвонай Арміі. У 1930 годзе ён скончыў Мінскае ваеннае пяхотнае вучылішча, у 1935 годзе — курсы пры Ваеннай акадэміі імя Фрунзе. У чэрвені 1941 года Жданаў паўторна быў прызваны ў армію і накіраваны на фронт Вялікай Айчыннай вайны. У 1942 годзе ён скончыў курсы «Стрэл». Да ліпеня 1943 года падпалкоўнік Павел Жданаў камандаваў 310-м стралковым палком 8-й стралковай дывізіі 13-й арміі Цэнтральнага фронту[1].
За перыяд з 23 ліпеня па 27 верасня 1943 года полк Жданава з баямі прайшоў больш за трыста кіламетраў. У раёне горада Корап Чарнігаўскай вобласці полк паспяхова фарсіраваў Дзясну, а затым на поўнач ад Кіева пераправіўся праз Дняпро і Прыпяць. Ва ўсіх аперацыях па фарсіраванням полк Жданава паспяхова захапіў і пашырыў плацдармы на заходніх берагах.
Указам Прэзідыума Вярхоўнага Савета СССР ад 16 кастрычніка 1943 года падпалкоўнік Павел Жданаў быў удастоены высокага звання Героя Савецкага Саюза з уручэннем ордэна Леніна і медалі «Залатая Зорка».
Пасля заканчэння вайны Жданаў быў звольнены ў запас. Пражываў у пасёлку Зэльва Гродзенскай вобласці Беларускай ССР, памёр 30 жніўня 1986 года[2].
Быў таксама ўзнагароджаны ордэнамі Чырвонага Сцяга, Суворава 3-й ступені, Айчыннай вайны 1-й ступені, Чырвонай Зоркі, шэрагам медалёў[1].
Павел Ільіч Жданаў на сайце «Героі краіны»