Віталь Віктаравіч Веліканаў (нар. 2 мая 1973, Рагачоў, Гомельская вобласць, БССР) — беларускі навуковец, кандыдат ветэрынарных навук, дацэнт, рэктар Беларускай дзяржаўнай сельскагаспадарчай акадэміі (з 16 мая 2019 года)[1].
У 1996 годзе скончыў Віцебскую дзяржаўную акадэмію ветэрынарнай медыцыны па спецыяльнасці «Ветэрынарыя» і атрымаў кваліфікацыю «Лекар ветэрынарнай медыцыны». З 1996 па 2003 гады — асістэнт кафедры клінічнай дыягностыкі[2].
У 2003 годзе скончыў аспірантуру пры кафедры клінічнай дыягностыкі Віцебскай дзяржаўнай акадэміи ветэрынарнай медыцыны і абараніў дысертацыю на суісканне вучонай ступені кандыдата ветэрынарных навук на тэму «Вывучэнне новых элементаў патагенезу страўнікава-кішачных захворванняў, эфектыўнасці прымянення сродкаў эферэнтнай тэрапіі пры захворваннях стрававальнай сістэмы ў свіней, якія суправаджаюцца сіндромам інтаксікацыі».
З 2003 года — дацэнт кафедры клінічнай дыягностыкі Віцебскай дзяржаўнай акадэміі ветэрынарнай медыцыны. З 2006 года — намеснік дэкана факультэта ветэрынарнай медыцыны, з 2007 года — начальнік аддзела выхаваўчай работы, у 2008—2014 гадах выконваў абавязкі загадчыка кафедры клінічнай дыягностыкі. З 2009 па 2019 гады — прарэктар па інфармацыйнай і выхаваўчай рабоце Віцебскай дзяржаўнай акадэміі ветэрынарнай медыцыны[3].
З 16 мая 2019 года — рэктар Беларускай дзяржаўнай сельскагападарчай акадэміі.
Галоўны накірунак навуковай дзейнасці — вывучэнне новых элементаў патагенезу страўнікава-кішачных захворванняў, эфектыўнасці прымянення сродкаў эферэнтнай тэрапіі пры захворваннях стрававальнай сістэмы ў свіней, якія суправаджаюцца сіндромам інтаксікацыі.
Аўтар больш за 90 друкаваных работ. З’яўляецца сааўтарам 2 навучальных, 1 практычнага, 1 даведачнага, 4 вучэбна-метадычных дапаможнікаў, 3 рэкамендацый, 9 настаўленняў па ўжыванні прэпаратаў.
Пад яго кіраўніцтвам было напісана і паспяхова абаронена 14 дыпломных работ, 4 магістарскія дысертацыі, падрыхтавана да абароны 1 кандыдацкая дысертацыя. У цяперашні час кіруе выкананнем 2 дысертацый на атрыманне вучонай ступені кандыдата навук.