У Вікіпедыі ёсць артыкулы пра іншых асоб з прозвішчам Лам.
Віфрэда Оскар дэ ла Кансепсьён Лам-і-Кастылья (ісп.: Wifredo Óscar de la Concepción Lam y Castilla, кіт. 林飛龍; 8 снежня 1902, Сагуа-ла-Грандэ, правінцыя Вілья-Клара — 11 верасня 1982, Парыж) — кубінскі жывапісец.
Бацька — кітайскі гандляр, які эміграваў на Кубу, маці — мулатка з прымешкай індзейскай крыві (дачка рабыні з Конга). У 1916 годзе сям’я пераехала ў Гавану. У 1918—1923 гадах Лам вучыўся ў школе прыгожых мастацтваў у Гаване, затым перасяліўся ў Іспанію. Выпрабаваў уплыў сюррэалізму, злучаючы яго з афра-кубінскімі (сантэрыя) міфалагічнымі матывамі і выяўленчымі традыцыямі. У 1932 годзе ў жыцці мастака здарылася вялікая трагедыя — смерць жонкі і дзіцяці. Гэта падзея адбілася на яго творчасці, надаўшы яму трывожныя і змрочныя рысы. Браў удзел у Грамадзянскай вайне ў Іспаніі на баку рэспубліканцаў. У 1938 годзе прыехаў у Парыж, дзе пазнаёміўся з Пікаса і яго сябрамі (Мацісам, Лежэ, Міро, Бракам, Элюарам), у тым жа годзе наведаў Мексіку, дзе пасябраваў з Фрыдай Кало і Дыега Рыверай. У 1939 годзе яго першая персанальная выстава адбылася ў парыжскай галерэі П’ера Лейба. У 1940 годзе пераязджае ў Марсэль, дзе прымае ўдзел у стварэнні «Марсельскай гульні». У тым жа годзе Лам па прапанове Андрэ Брэтана ілюстраваў яго кнігу «Фата Маргана» (выдадзена ў Марселі, перавыдадзена ў Буэнас-Айрэсе), пазней ілюстраваў кнігі Рэнэ Шара і інш. У 1940-я гады атрымаў прызнанне, як на радзіме, так і ва ўсім свеце. У 1942 годзе пераехаў на Кубу, дзе пражыў 10 гадоў, потым вярнуўся ў Францыю. Знаходзіўся ў апазіцыі да рэжыму Батысты, у 1955 годзе выстаўляўся ў Гаванскім універсітэце ў знак салідарнасці з прысутнымі студэнтамі. Падтрымаў новы сацыялістычны ўрад, напісаўшы «Трэці свет» для прэзідэнцкага палаца.