Барыс Аляксандравіч Багатаў (нар. 1 красавіка 1938, г. Арэхава-Зуева, Маскоўская вобласць, Расія — 6 кастрычніка 2005) — беларускі спецыяліст у галіне мадэлявання і аптымізацыі працэсаў горнай вытворчасці. Доктар тэхнічных навук (1974), прафесар (1979).
Скончыў Маскоўскі тарфяны інстытут (1960).
Працаваў Усесаюзным навукова-даследчым інстытуце тарфяной прамысловасці (1960—1964, старшы навуковы супрацоўнік, загадчык лабараторыі брыкетавання), Усесаюзным навукова-даследчым інстытуце сінтэтычных валокнаў (1965—1967, старшы навуковы супрацоўнік лабараторыі працэсаў і апаратаў), Калінінскім політэхнічным інстытуце (1972—1977, дацэнт, загадчык кафедры вышэйшай матэматыкі), Беларускім нацыянальным тэхнічным універсітэце (1977—2005, факультэт горнай справы і інжынернай экалогіі, кафедра «Горныя работы», загадчык кафедры, адначасова з 2002 — дэкан факультэта).
Навуковыя інтарэсы: мадэляванне, матэматычнае апісанне і аптымізацыя тэхналагічных працэсаў распрацоўкі радовішчаў торфу; рэсурсазберажэнне; ахова навакольнага асяроддзя.