Балкі — возера ў Жыткавіцкім раёне Гомельскай вобласці, за 19 км на паўднёвы захад ад горада Жыткавічы, за 2,4 км на паўднёвы захад ад вёскі Князь-Бор. Адносіцца да басейна ракі Прыпяць (знаходзіцца ў яе пойме).
Возера старычнага тыпу, серпападобнай формы. Берагі пераважна нізкія, пясчаныя і пясчана-галечнікавыя, параслі хмызняком і рэдкалессем. Злучана шырокай пратокай з возерам Доўгая Тоня, вузкімі пратокамі з возерам Дзяменіца і старычным рукавом Прыпяці.
У возеры водзяцца шчупак, лешч, карась, лінь, плотка, акунь і іншыя віды рыб.
У раёне возера адзначаны рэдкі від птушак, які занесены ў Чырвоную кнігу Рэспублікі Беларусь, — кобчык.
