У гэтага паняцця ёсць і іншыя значэнні, гл. Сака.
Асака дзірваністая[3] (Carex cespitosa) — травяністая расліна сямейства асаковых.
Асака дзірваністая, целарэз[3], кустовіца, сака[4], смочка, сочка[5][6], аір[5].
Расліна вышынёй 20—140 см, утварае купіны. Сцяблы скучаныя, тонкія, востратрохгранныя, каля асновы з цёмна-пурпуровымі, сеткавата-расшчэпленымі похвамі. Лісце зялёнае, пляскатае, вузкалінейнае, завостранае. Колас з 1 тычынкавага і 2 песцікавых кароткацыліндрычных каласкоў. Прыкветны ліст шчацінкападобны. Лускавінкі каласкоў яйцападобныя, тупыя, чорна-бурыя. Рыльцаў 2. Мяшочкі двойчыпукатыя, эліптычныя, іржава-зялёныя, без жылак, з кароткім песцікам.
Пашырана ў Еўразіі. Расце на нізінных балотах, у алешніках, забалочаных хмызняках. На Беларусі трапляецца часта, цвіце ў маі.
Кармавая расліна, багатая пратэінам. Выкарыстоўваецца на сілас.