Арнегунда (фр.: Arnegonde de Worms, Arégonde або Aregunda, каля 520 — каля 565) — другая жонка караля франкаў Хлотара I, дачка Бадэрыха, караля Цюрынгіі, і Арнегунды Саксонскай. Імя Арнегунда ў перакладзе са стара-германскай мовы азначае «Ваяўнічая арліца». Сястра першай жонкі Хлотара, Інгунды.
Грыгорый Турскі ў «Гісторыі франкаў» расказвае, што аднойчы Інгунда звярнулася да мужа з просьбай знайсці для яе сястры паважанага і заможнага мужа. Хлотар не знайшоў нікога годней за сябе і ажаніўся з Арнегундай сам. Ад гэтага шлюбу нарадзіўся сын — Хільперык, будучы кароль Нейстрыі і дачка Блітхільда.
Арнегунда памерла каля 565 года (некаторыя гісторыкі датуюць яе смерць паміж 570 і 573 гг. ці паміж 580 і 590 гг.) і была пахавана ў базіліцы Сен-Дэні. Пахаванне Арнегунды было выяўлена ў 1959 годзе французскім археолагам Мішэлем Флеры. У грабніцы знаходзіліся рэшткі жанчыны ў багатых адзеннях, а сярод мноства каштоўнасцей быў выяўлены пярсцёнак з выгравіраваным надпісам Arnegundis Regina, што і дазволіла ідэнтыфікаваць грабніцу.