У Вікіпедыі ёсць артыкулы пра іншых людзей з імем Аляксей I.
Аляксе́й I Вялі́кі Камні́н (грэч.: Αλέξιος Α΄ Μέγας Κομνηνός; 1181, Канстанцінопаль — 1222, Трапезунд) — першы імператар Трапезундскай імперыі ў 1204—1222 гадах, заснавальнік дынастыі Вялікіх Камнінаў.
Аляксей быў сынам севастакратара Мануіла Камніна і даводзіўся ўнукам візантыйскаму імператару Андроніку I. Пасля гібелі сваіх дзеда і бацькі ў выніку перавароту ў 1185 годзе ў Канстанцінопалі, малалетніх Аляксея і яго брата Давіда тайна вывезлі ў Грузію да іх цёткі, царыцы Тамары.
Пасля захопу Канстанцінопаля крыжакамі ў 1204 годзе ў выгнаннікаў з’явілася магчымасць паспрабаваць вярнуць сабе імператарскую ўладу. Пры ваеннай падтрымцы Грузіі, Аляксей і Давід зацвердзілі сваю ўладу ў некалькіх гарадах на паўднёвым узбярэжжы Чорнага мора, і неўзабаве пасля гэтага Аляксей быў абвешчаны імператарам.
Аднак пасля некалькіх паражэнняў трапезундцаў ад войскаў нікейскага імператара Феадора Ласкарыса і сельджукаў, Аляксею прыйшлося адмовіцца ад прэтэнзій на агульнавізантыйскі прастол і прызнаць васальную залежнасць ад Канійскага султаната.
У вялікай ступені дзякуючы гэтаму, а таксама палітычнаму саюзу з Грузіяй, досыць слабая ў ваенным плане Трапезундская імперыя была ў стане на працягу дзвюх з паловай стагоддзяў захоўваць уласную дзяржаўнасць.
| Папярэднік: новы тытул |
Трапезундскі імператар 1204—1222 |
Пераемнік: Андронік I Гід |