Шэйх Акрам аль-Каабі (араб. أكرم الكعبي; нар. 17 ліпеня 1977[1]) — лідар іракскай групоўкі «Харакат Ан-Нуджаба»[2].
Нарадзіўся ў шыіцкай сям’і. Пад кіраўніцтвам аяталы Мухамада Садык ас-Садра вывучаў шарыяцкія навукі ў Наджафе, быў імамам горада Мусаіб. Незадоўга да амерыканскага ўварвання знаходзіўся ў турме асаблівага прызначэння як праціўнік рэжыму Садама Хусейна.
З пачаткам акупацыі Ірака далучыўся да «Арміі Махдзі». Вельмі хутка ён атрымаў пасаду камандзіра аднаго з атрадаў у Наджафе[3]. Каабі кіраваў нападамі на іракскія і кааліцыйныя сілы. У ліпені 2006-га перайшоў у групоўку «Асаіб Ахль аль-Хак» і быў прызначаны намеснікам кіраўніка арганізацыі[2].
Затым ён на некаторы час пакінуў справы групоўкі і вярнуўся да рэлігійнай дзейнасці. Аднак з пачаткам вайны ў Сірыі ў 2011 годзе Каабі аднавіўся ў «Асаіб Ахль аль-Хак». У 2013 годзе ў складзе арганізацыі пад яго кіраўніцтвам было заснавана апалчэнне «Харакат Ан-Нуджаба»[4]. У 2014-м яно далучылася да кааліцыі «Сілы народнай мабілізацыі», якая займалася барацьбой з ІДІЛ.
16 верасня 2008 года Міністэрства фінансаў ЗША унесла Акрама аль-Каабі ў спіс асабліва пазначаных глабальных тэрарыстаў (англ.: Specially Designated Global Terrorist, SDGT)[5]. 5 сакавіка 2019-га Дзяржаўны дэпартамент ЗША на падставе Указа №13224 ад 2001 года прысвоіў яму той жа статус[2].
Яшчэ падчас сваёй дзейнасці ў «Арміі Махдзі» Каабі атрымаў фінансаванне з боку Ірана, стаўшы адным з галоўных аператыўнікаў спецпадраздзялення «Кудс» КВIР у Іраку[2]. Дзякуючы гэтым сувязям ён прайшоў курсы ваеннай навукі і стратэгічнага кіравання[3].
Характэрна, што ў адрозненне ад іншых лідараў іракскіх апалчэнцаў, якія абапіраліся на аяталу Ірака Алі Сістані, яго аўтарытэтам стаў іранскі аятала Алі Хаменеі[6]. У інтэрв’ю 2015 года для Long War Journal Каабі заявіў, што калі той аддасць загад, то ён будзе гатовы нават скінуць дзеючы ўрад у Багдадзе[7].