wd wp Пошук: ⬜

Юрый Касабуцкі

У Вікіпедыі ёсць артыкулы пра іншых асоб з прозвішчам Касабуцкі. Юрый Касабуцкі (нар. 15 лютага 1970, Маладзечна) — беларускі каталіцкі дзеяч, дапаможны біскуп Мінска-Магілёўскай архідыяцэзіі.

Біяграфія

Скончыў сярэднюю школу № 8 у Маладзечне (1987). Вучыўся ў Беларускім дзяржаўным інстытуце народнай гаспадаркі, адбыў тэрміновую службу ў арміі. Затым паступіў у Вышэйшую духоўную семінарыю ў Гродне (1991). Прэсвітарскае пасвячэнне прыняў 7 снежня 1996, служыў у Мінска-Магілёўскай архідыяцэзіі. Выконваў абавязкі вікарыя парафіі Унебаўзяцця Найсвяцейшай Марыі Панны і Св. Станіслава ў Магілёве і адміністратара парафіі Узвышэння Святога Крыжа ў Вілейцы. З 1999 па 2001 вучыўся ў Люблінскім каталіцкім універсітэце (Польшча), дзе атрымаў ступень ліцэнцыята тэалогіі. З 2001 па 2004 выконваў абавязкі прэфекта Міждыяцэзіяльнай вышэйшай духоўнай семінарыі ў Пінску. У 2004 прызначаны дырэктарам Сакратарыяту Канферэнцыі Каталіцкіх Біскупаў Беларусі. З 2005 выконвае абавязкі канцлера курыі Мінска-Магілёўскай архідыяцэзіі. З 2006 г. з’яўляецца таксама адміністратарам парафіі Найсвяцейшай Тройцы (св. Роха) на Залатой Горцы ў Мінску. З’яўляецца выкладчыкам у Міждыяцэзіяльнай вышэйшай духоўнай семінарыі ў Пінску і Катэхетычным каледжы імя Св. Яна Хрысціцеля ў Мінску. 29 лістапада 2013 прызначаны дапаможным біскупам Мінска-Магілёўскай архідыяцэзіі.[1] 25 студзеня 2014 атрымаў біскупскае пасвячэнне.

Пасля жорсткага разгону акцый пратэстаў, збіцця і катаванняў затрыманых, архібіскуп Тадэвуш Кандрусевіч выступіў супраць гвалту[2]. 31 жніўня, пасля вяртання з паездкі ў Польшчу, беларускія памежнікі адмовілі мітрапаліту ва ўездзе ў краіну[3]; Аляксандр Лукашэнка заявіў, што кіраўнік Каталіцкай Царквы выехаў «па інструкцыі знішчэння Беларусі»[4]. Пры адсутнасці архібіскупа кіраванне Мінска-Магілёўскай архідыяцэзіяй узяў на сябе генеральны вікарый біскуп Юрый Касабуцкі.

Пасля збіцця да смерці Рамана Бандарэнкі 13 лістапада Юрый Касабуцкі на наступны дзень на імшы памяці забітага выказаў захапленне нараджэннем новай салідарнасці ў беларусах і адзначыў, што грамадства напоўненае гераізмам, як у вайну, калі «хавалі людзей ад карнікаў»[5]. Ён таксама выказаўся з нагоды гвалтоўнага разбурэння 15 лістапада народнага мемарыяла памяці Бандарэнкі на «плошчы Перамен», з якой той быў выкрадзены перад забойствам, і масавых арыштаў[6]:

Сённяшнія паводзіны сілавікоў паказваюць павялічэнне страху і боязі дзяржаўнай улады ў дачыненні да беларускага народа. Разбурэнне народнага мемарыяла, які паўстаў на месцы брутальнага захопу Рамана Бандарэнкі, быў чарговай спробай знішчыць усё тое высакароднае, чыстае, светлае, што ёсць у нашых людзей. Арышт шматлікіх мірных грамадзян павінен запалохаць іншых людзей.

Пасля абурэння Аляксандра Лукашэнкі Генеральная пракуратура Беларусі вынесла 18 лістапада папярэджанне біскупу Касабуцкаму аб недапушчальнасці парушэння закона, заявіўшы, што такія выказванні «распальваюць нянавісць да прадстаўнікоў органаў дзяржаўнай улады, у тым ліку праваахоўных органаў»[7].

Зноскі

Спасылкі

Юрый Касабуцкі на сайце Сatholic.by (бел.)
Юрый Касабуцкі на сайце «Catholic Hierarchy» (англ.)

Тэмы гэтай старонкі (17):
Постаці Магілёва
Выпускнікі БДЭУ
Постаці Мінска
Выкладчыкі Пінскай вышэйшай духоўнай семінарыі
Выкладчыкі Мінскага тэалагічнага каледжа імя Св. Яна Хрысціцеля
Выпускнікі школы № 8 (Маладзечна)
Вікіпедыя:Біяграфіі сучаснікаў
Вікіпедыя:Шаблон «Вонкавыя спасылкі» пусты
Нарадзіліся ў 1970 годзе
Біскупы мінска-магілёўскія
Вікіпедыя:Артыкулы з пераазначэннем значэння з Вікідадзеных
Нарадзіліся 15 лютага
Нарадзіліся ў Маладзечне
Выпускнікі Люблінскага каталіцкага ўніверсітэта
Асобы
Выпускнікі Гродзенскай вышэйшай духоўнай семінарыі
Постаці Вілейкі