У Вікіпедыі ёсць артыкулы пра іншых асоб з прозвішчам Коры.
Эліяс Джэймс Ко́ры ( англ.: Elias James Corey; 12 ліпеня 1928, Метуен, штат Масачусетс, ЗША) — амерыканскі хімік-арганік, лаўрэат Нобелеўскай прэміі па хіміі (1990).
Скончыў Масачусецкі тэхналагічны інстытут (1950). З 1954 года працуе ў Гарвардскім універсітэце, з 1959 года прафесар.
Навуковыя працы па тэорыі і методыцы арганічнага сінтэзу. Распрацаваў прынцыпы рэтрасінтэзнага аналізу і простыя агульныя метады атрымання складаных біялагічна актыўных рэчываў. Сінтэзаваў гіберэлавую кіслату.
Дзейнасць Эліяса Коры атрымала высокую ацэнку з боку навуковай супольнасці. Ён быў узнагароджаны медалём Франкліна (англ.: Franklin medal) у 1978 годзе, атрымаў прэмію Вольфа па хіміі (1986), прэмію Японіі (1989), Нобелеўскую прэмію па хіміі (1990) і медаль Прыстлі (2004).