Раса́сенка — рака ў Дубровенскім раёне Віцебскай вобласці Беларусі, левы прыток Дняпра.
Даўжыня ракі 43 км. Пачынаецца за 1 км на ўсход ад вёскі Пішчыкі. Працякае па ўсходніх схілах Смаленскага ўзвышша і ўпадае ў Дняпро на ўскраіне аграгарадка Расасна. Плошча вадазбору складае каля 271 км².
Даліна трапецападобнай формы шырынёй да 2 км. Рэчышча звілістае, ў вярхоўі каналізаванае. У ніжнім цячэнні шырыня рэчышча дасягае 10 м.
У Расасенку ўпадаюць каналы, ручаі і невялікія рэчкі. Сярод прытокаў — рэкі Перавалочка, Лукі, Любкіння, Сіманіха, Мілкаўка (справа), Трань, Баброўка (злева)[1].