Пясча́нка чаборалістая[3] (Arenaria serpyllifolia) — від кветкавых раслін роду Пясчанка (Arenaria) сямейства Гваздзіковыя (Caryophyllaceae). Тыпавы від роду.
Аднагадовая залозіста апушаная кароткімі валаскамі травяністая расліна вышынёй 5—20[3] см. Сцябло прамастойнае або прыўзнятае, галінастае. Лісце дробнае, супраціўнае, простае, суцэльнае, з гладкім краем і завостранай верхавінкай, апушанае. Верхняе лісце сядзячае, ніжняе — на кароткіх чаранках. Кветкі дробныя, белага колеру, у несапраўдных паўпарасоніках. Пялёсткаў — 5. Тычынак — 10. Плод — шматнасенная каробачка, якая раскрываецца 6 зубцамі.
Расліна распаўсюджана ва ўмераных і трапічных абласцях Еўразіі і Паўночнай Афрыкі[4]. Натуралізавалася на тэрыторыі Аўстраліі, Новай Зеландыі, Паўночнай і Паўднёвай Амерыкі[4]. Святлолюбівая расліна, мезафіт і мезатроф[5]. Расце на лугах, камяністых россыпах, садах і агародах, пустках, газонах, аблогах, каля дарог. Пустазелле.