wd wp Пошук:
    ⬜

    Пустыня Гібсана

    Рэгіён пустыні Гібсана ў адпаведнасці з IBRA
    Тыповы пейзаж пустыні Гібсана

    Пустыня Гібсана (англ.: Gibson Desert) — пясчаная пустыня ў Аўстраліі (у цэнтры штата Заходняя Аўстралія), размешчана на поўдзень ад тропіка Казярога, паміж Вялікай Пясчанай пустыняй на поўначы і Вялікай пустыняй Вікторыя на поўдні.

    Пустыня Гібсана мае плошчу 155 530 км²[1] і размяшчаецца ў межах плато, якое складзена дакембрыйскімі пародамі і пакрыта шчабёнкай, якая ўзнікла ў выніку разбурэння старажытнага жалезістага панцыра. Адзін з першых даследчыкаў рэгіёна ахарактарызаваў яе як «велізарную пагорыстую пустыню з гравія»[2]. Сярэдняя вышыня пустыні складае 411 м,[1] ва ўсходняй частцы знаходзяцца астанцавыя кражы вышынёй да 762 м, складзеныя гранітамі і пясчанікам. З захаду пустыня абмежавана хрыбтом Хамерслі. У заходняй і ўсходняй частках складаецца з доўгіх паралельных пясчаных град, але ў цэнтральнай частцы рэльеф выраўноўваецца.[1] У заходняй частцы ляжаць некалькі азёр-саланчакоў, уключаючы возера Дысапайнтмент плошчай 330 км2, якое размешчана на мяжы з Вялікай Пясчанай пустыняй.

    Ападкі выпадаюць вельмі нерэгулярна, іх колькасць не перавышае 250 мм у год. Глебы пясчаныя, багатыя жалезам, дужа выветраны. Месцамі сустракаюцца зараснікі бязжылкавай акацыі, лебяды і травы спініфекс, якія расквітаюць яркімі кветкамі пасля рэдкіх дажджоў[2]

    На тэрыторыі пустыні Гібсана ў 1977 годзе быў арганізаваны запаведнік (англ.: Gibson Desert Nature Reserve), плошча якога складае 1 859 286 га.[1] Запаведнік насяляе мноства пустэльных жывёл, такіх як вялікія білбі (пад пагрозай знішчэння), чырвоныя кенгуру, эму, аўстралійская аўдотка, паласатая травяная крапіва і малох. На возера Дысапайнтмент і суседнія азёры, якія з’яўляюцца пасля рэдкіх дажджоў, злятаюцца птушкі ў пошуку абароны ад засушлівага клімату.[2]

    Населена пераважна аўстралійскімі абарыгенамі, тэрыторыя пустыні выкарыстоўваецца пад экстэнсіўную пашавую жывёлагадоўлю. Пустыня адкрыта ў 1873 (або 1874[3]) годзе англійскай экспедыцыяй Эрнэста Джайлса, які перасек яе ў 1876 годзе. Назву пустыня атрымала ў гонар члена экспедыцыі Альфрэда Гібсана, які загінуў у ёй пры пошуку вады.[3]

    Зноскі

    1. 1 2 3 4 Gibson desert — Encarta
    2. 1 2 3 Gibson desert — Terrestrial Ecoregions
    3. 1 2 Gibson Desert (desert, Western Australia, Australia) — Britannica Online Encyclopedia

    Спасылкі

    Тэмы гэтай старонкі (3):
    Category:%D0%A1%D1%82%D0%B0%D1%80%D0%BE%D0%BD%D0%BA%D1%96 %D0%B7 %D0%BA%D0%B0%D1%80%D1%82%D0%B0%D0%BC%D1%96
    Катэгорыя·Пустыні Аўстраліі
    Катэгорыя·Геаграфія Заходняй Аўстраліі