Памятны знак у гонар Георгія Мікітавіча Халасцякова — памятны знак Герою Савецкага Саюза Георгію Мікітавічу Халасцякову ў Баранавічах.
Халасцякоў Георгій Мікітавіч (1902-1983) – ураджэнец горада Баранавiчы, яго ганаровы грамадзянiн, знакамiты i таленавiты флатаводзец у гады Вялікай Айчыннай вайны, узнагароджаны медалямі і ардэнамі Савецкага Саюза і многіх замежных дзяржаў.
У 1984 годзе вуліца Капернiка была перайменавана ў вуліцу Халасцякова з адкрыццём на доме №2 мемарыяльнай дошкі, а ў 2002 годзе да 100-годдзя з дня нараджэння Халасцякова на вуліцы яго імя быў адкрыты памятны знак.
На прыродным валуне (вышыня 1,2 м) замацавана металічная дошка з сілуміна, зробленая ў выглядзе паруса, з надпісам «Вуліца названа ў гонар Халасцякова Георгія Мікітавіча, віцэ-адмірала, Героя Савецкага Саюза, ураджэнца і ганаровага грамадзяніна г.Баранавічы». Побач з валуном на ланцугу замацавана котва.[1].