У Вікіпедыі ёсць артыкулы пра іншых асоб з прозвішчам Хэвісайд. Олівер Хэвісайд (Хевісайд) (анг. Oliver Heaviside, 18 мая 1850 — 3 лютага 1925) — англійскі вучоны-самавук, інжынер, матэматык і фізік. Упершыню ўжыў комплексныя лікі для вывучэння электрычных ланцугоў, распрацаваў тэхніку прымянення пераўтварэння Лапласа для вырашэння дыферэнцыяльных ураўненняў, перафармуляваў ураўненні Максвела ў тэрмінах трохмерных вектараў, напружванняў электрычнага і магнітнага палёў і электрычнай і магнітнай індукцыі, і, незалежна ад іншых матэматыкаў, стварыў вектарны аналіз. Нягледзячы на тое, што Хэвісайд вялікую частку жыцця быў не ў ладах з навуковай супольнасцю, яго працы змянілі аблічча матэматыкі і фізікі.