Мінская балотная доследная станцыя

Трэба выправіць арфаграфію ў артыкуле! Магчыма гэты машынны пераклад або выкарыстанне ненарматыўнага правапісу ці лексікону. Для спраўджэння існуюць адмысловыя праграмы.

Мінская балотная доследная станцыя — першая навуковая ўстанова на Беларусі. Была заснавана паводле рашэння Мінскага земства 21 жніўня 1911 года. Першым дырэктарам быў А. Ф. Флёраў. Доследная гаспадарка станцыі знаходзілася ля прыпынку Лахва Палескай чыгункі.

Доследы вяліся на 7,5 дзесяцінах балотнай глебы. Вывучаліся пытанні земляробзтва, раслінаводства, лугаводства, меліярацыі, глебазнаўства, аграхіміі і агратэхнікі. У 1912—1917 гадах выдаваўся адмысловы навуковы часопіс «Болотоведение» (бел.: «Балотазнаўства») (з 1915 года выходзіў у Маскве), які друкаваў справаздачы пра дзейнасць станцыі, навуковыя артыкулы, прысвечаныя распрацоўцы і гаспадарчаму выкарыстанню балотаў, тарфянікаў, паведамленні пра новыя машыны па асушэнні забалочаных глебаў і здабычы торфу, агляды айчыннай і замежнай літаратуры па балотнай справе.

У 1912 годзе станцыя прыняла ўдзел у юбілейнай сельскагаспадарчай і саматужнай выставе, арганізаванай Смаленскім таварыствам сельскай гаспадаркі. У навуковым аддзеле экспанаваліся фатаздымкі балотаў, узоры балотавых глебаў і расліннасці, чорнага (моранага) дуба, у навукова-прыкладным — фатаздымкі даследчай балотнай гаспадаркі ў Лахве, узоры культураў, вырашчаных на даследчых дзялянках, адмысловыя прылады працы, балотныя чаравікі для коней. Тады ж супрацоўнікі станцыі ўдзельнічалі ў нарадзе па кармавых раслінах, лугаводству і асушэнні балотаў Беларусі.

У 1913 годзе Мінская балотная станцыя ператварылася ў раённую. Пад яе дзейнасць падпалі Мінская, Валынская, Гродзенская, Чарнігаўская і Магілёўская губерні.

У 1930 годзе на базе станцыі і аддзела асушэння і культуры балотаў Беларускага дзяржаўнага інстытута сельскай гаспадаркі арганізаваўся навукова-даследчы інстытут балотнай гаспадаркі.

Станцыя знаходзілася на рагу цяперашніх мінскіх вуліц Максіма Багдановіча і Сурганава.[1]

Зноскі

1. ↑ Шыбека З. В., Шыбека С. Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С. М. Станюты. — Мн.: Полымя, 1994. С. 276—278

Літаратура

• Шыбека З. В., Шыбека С. Ф. Мінск: Старонкі жыцця дарэв. горада/ Пер. з рускай мовы М.Віжа; Прадмова С. М. Станюты. — Мн.: Полымя, 1994. — 341 с. [1] асобн. арк. карт.: іл. ISBN 5-345-00613-X.