Львоўскі гандлёва-эканамічны ўніверсітэт (укр.: Львівський торговельно-економічний університет) — вышэйшая навучальная ўстанова эканамічнага профілю ў Львове. Старэйшы гандлёва-эканамічны ўніверсітэт і адзін з вядучых эканамічных універсітэтаў Украіны. Заснаваны 7 сакавіка 1816 года загадам аўстрыйскага імператара Франца І.
На дзённай і завочнай формах навучання ўніверсітэт рыхтуе бакалаўраў, спецыялістаў і магістраў больш чым па 50 спецыяльнасцях. Па заканчэнні навучання ўніверсітэт выдае дыплом дзяржаўнага ўзору.
Вядзецца падрыхтоўка навуковых кадраў вышэйшай кваліфікацыі праз аспірантуру па васьмі спецыяльнасцях эканамічнага профілю і дактарантуру па трох спецыяльнасцях. Функцыянуе тры спецыялізаваныя саветы па абароне дысертацый.
7 сакавіка 1816 года дэкрэтам імператара Франца І была створана Львоўская рэальна-гандлёвая школа. На яе аснове 8 верасня 1899 года па ініцыятыве міністэрства веравызнанняў і адукацыі Аўстра-Венгрыі імператар Франц Іосіф I сваёй пастановай стварыў Вышэйшую гандлёвую школу ў Львове. Першым яе кіраўніком стаў прафесар Антоній Паўлоўскі. Афіцыйнае адкрыццё Вышэйшай гандлёвай школы адбылося 2 кастрычніка 1899 года ў памяшканні тэатра Станіслава Скарбэка (сучасны будынак Нацыянальнага акадэмічнага ўкраінскага драматычнага тэатра імя М. Занькавецкай). У 1902 годзе Вышэйшая гандлёвая школа атрымала статус Акадэміі. У 1922 годзе Гандлёвая акадэмія была рэарганізавана ў Вышэйшую школу замежнага гандлю. Рэктарам зноў быў прызначаны прафесар А. Паўлоўскі.
У 1937 г. Вышэйшая школа зноў атрымала статус Акадэміі. З 1936 г. Акадэмія знешняга гандлю размяшчалася ў новым, спецыяльна пабудаваным будынку ў Львове па вул. Сакрамэнтак, 10 (зараз — вул. М. Туган-Бараноўскага), дзе да гэтага часу размяшчаецца галоўны корпус універсітэта.
Пасля ўстанаўлення ў Заходняй Украіне савецкай улады Акадэмія была рэарганізавана ў Інстытут савецкага гандлю (чэрвень 1940 г.). У 1945 г. з Харкава быў пераведзены Украінскі савецкі інстытут кааператыўнага гандлю (арганізаваны ў Кіеве 1 студзеня 1920 г.). У 1947 г. шляхам аб’яднання Львоўскага інстытута савецкага гандлю і Інстытута савецкага кааператыўнага гандлю быў створаны Львоўскі гандлева-эканамічны інстытут, які спецыялізаваўся на падрыхтоўцы спецыялістаў для сістэмы спажывецкай кааперацыі — бухгалтараў, эканамістаў, таваразнаўцааў.
Першым дырэктарам Львоўскага гандлёва-эканамічнага інстытута пасля Другой сусветнай вайны стаў Сямён Данілавіч Гаркавенка.
У перыяд з 1993 па 2015 год універсітэт называўся Львоўскай камерцыйнай акадэміяй[1]. З 2015 года навучальная ўстанова змяніла назву і статус на Львоўскі гандлёва-эканамічны ўніверсітэт[2].
У структуры ўніверсітэта функцыянуюць таксама Украінскі інстытут «Укаапінфармпраект», навукова-даследчая лабараторыя эканамічнай ацэнкі, бізнэс-цэнтр «Інтэрэканоміка», Цэнтр англійскай мовы, Цэнтр французскай мовы, выдавецтва, бібліятэка, архіў, аддзел міжнароднага супрацоўніцтва і стратэгічнага развіцця, навучальны комплекс «Акадэмія», у склад якога ўвайшлі кааператыўныя тэхнікумы, каледжы, вучылішчы і звыш 40 львоўскіх агульнаадукацыйных школ.
Будынкі:
Інтэрнаты:
Бібліятэкі: