Калякве́тнік (лац.: perianthium) — лістападобныя покрыўныя органы кветкі, якія акружаюць тычынкі і песцік. У падвоенага калякветніка (званочак) вонкавыя зялёныя лісцікі — чашачка, унутраныя ярка афарбаваныя — вяночак. Просты калякветнік складаецца з аднолькавых па афарбоўцы лісткоў (у лілеі). Бывае ярка афарбаваны, паходзіць на вяночак і называецца вяночкападобным (у цюльпана), калі калякветнік зялёны і паходзіць на чашачку то называецца чашачкападобным (у крапівы). У некаторых відаў калякветнік адсутнічае (у вярбы, ясеня), таму кветкі называюцца голымі ці бяспокрыўнымі.