Казяніцы[1] (польск.: Kozienice) — горад у Польшчы, за 90 км на поўдзень ад цэнтра Варшавы. Адміністрацыйны цэнтр Казяніцкага павета Мазавецкага ваяводства, сядзіба вяскова-гарадской гміны Казяніцы. Займае плошчу 10,45 км². Насельніцтва 17,7 тыс. чалавек (на 2018).
Казяніцы — былая каралеўская маёмасць, месца нараджэння караля Жыгімонта Старога. У памяць аб гэтай падзеі ў 1518 годзе паставілі калону. Яна з’яўляецца самым старым свецкім помнікам у Польшчы.
Тут меўся палац з паркам, а таксама пушча для каралеўскага палявання. Пасля падзелаў Рэчы Паспалітай гэтая маёмасць была падорана нейкаму рускаму генералу.
З 1920-х палац з афіцынамі стаў дзяржаўнай маёмасцю, і тут пачала працаваць дзяржаўная канюшня для гадоўлі пародзістых коней, а потым і коней для спорту. Пасля Другой сусветнай вайны англійскі пункт дапамогі быў арганізаваны ў афіцыне каля напаўзгарэлага палаца. Дзейнічала місія англійскіх квакераў.