У Вікіпедыі ёсць артыкулы пра іншых асоб з прозвішчам Васіленка.
Зоя Васільеўна Васіленка (нар. 30 чэрвеня 1946, в. Слабодка, Курская вобласць, РСФСР, СССР) — беларускі вучоны ў галіне харчовай тэхналогіі. Член-карэспандэнт Нацыянальнай акадэміі навук Беларусі (2003), член-карэспандэнт Акадэміі аграрных навук Рэспублікі Беларусь (1996—2002), доктар тэхнічных навук (1988), прафесар (1990). Заслужаны дзеяч навукі Рэспублікі Беларусь (2001).
У 1968 годзе скончыла Маскоўскі інстытут народнай гаспадаркі імя Г. В. Пляханава па спецыяльнасці «Тэхналогія і арганізацыя вытворчасці прадуктаў грамадскага харчавання», у 1971 годзе — аспірантуру, у 1988 годзе — дактарантуру.
У 1971 годзе абараніла дысертацыю на атрыманне вучонай ступені кандыдата тэхнічных навук на тэму: «Уплыў некаторых фактараў на жэлацінавыя ўласцівасці агароіда і фурцэларана». У 1971—1974 гадах працавала па кірунку Мінвну СССР у Далёкаўсходнім інстытуце савецкага гандлю на пасадах асістэнта, старшага выкладчыка, дацэнта кафедры «Тэхналогія і абсталяванне прадпрыемстваў грамадскага харчавання».
З 1974 года — загадчыца кафедры «Тэхналогія і арганізацыя грамадскага харчавання» Магілёўскага тэхналагічнага інстытута, якую ўзначальвае па цяперашні час. Адначасова ў 1994—1996 гадах дэкан хіміка-тэхналагічнага факультэта МТІ.
У 1988 годзе абараніла дысертацыю на атрыманне вучонай ступені доктара тэхнічных навук на тэму: «Протапектынавы комплекс і тэхналагічныя ўласцівасці гародніны» у Маскоўскім інстытуце народнай гаспадаркі імя Г. В. Пляханава. У 1990 годзе прысвоена званне прафесара па спецыяльнасці «Тэхналогія і арганізацыя грамадскага харчавання».
Аўтар больш за 400 навуковых прац, у тым ліку 9 кніг, 14 вучэбных дапаможнікаў, 36 вынаходстваў і патэнтаў[1].