Уільям Дэвід Трымбл, барон Трымбл (англ.: William David Trimble, Baron Trimble, 15 кастрычніка 1944, Белфаст, Паўночная Ірландыя, Вялікабрытанія — 25 ліпеня 2022, Белфаст, Паўночная Ірландыя, Вялікабрытанія) — паўночнаірландскі брытанскі палітык, лідар Ольстэрскай юніёнісцкай партыі з 1995 па 2005. Першы міністр Паўночнай Ірландыі з 1 ліпеня 1998 да 1 ліпеня 2001 года, а таксама з 1 лістапада 2001 да 14 кастрычніка 2002. У 1998 годзе сумесна з Джонам Х’юмам стаў лаўрэатам Нобелеўскай прэміі міру (1998) за дзейнасць па пошуку мірнага вырашэння канфлікту ў Паўночнай Ірландыі. З 2006 года з’яўляўся пажыццёвым пэрам і членам Палаты лордаў. У 2007 годзе, пакінуўшы партыю юніёністаў, уступіў у Кансерватыўную партыю.