Гэты артыкул пра валюту Рэспублікі Сербскай; пра валюту Сербіі гл.: Сербскі дынар. У гэтага паняцця ёсць і іншыя значэнні, гл. Дынар. Дынар Рэспублікі Сербскай (сербск.: Динар Републике Српске) — грашовая адзінка Рэспублікі Сербскай у 1992—1998 гадах.
Дынар быў уведзены ў 1992 годзе і знаходзіўся ў абароце паралельна з югаслаўскім дынарам у суадносінах 1:1.
Банкноты Народнага банка Рэспублікі Сербскай Босніі і Герцагавіны ўзору 1992 года былі выпушчаны наміналам у 10, 50, 100, 500, 1000, 5000, 10 000 дынараў. Потым былі выпушчаны банкноты з аналагічным афармленнем узору 1993 года ў 50 000, 100 000, 1 мільён, 5 мільёнаў, 10 мільёнаў дынараў. У 1993 годзе былі выпушчаны купюры ў 50 дынараў узору 1992 года з наміналам, змененым на 50 мільёнаў дынараў шляхам нанясення наддрукоўкі «МИЛИОНА ДИНАРА».
12 жніўня 1992 года была зменена назва банка, які стаў звацца Народны банк Рэспублікі Сербскай. Банкноты з новай назвай банка былі выпушчаны ў 1993 годзе з захаваннем дызайну банкнот папярэдніх выпускаў. Наміналы банкнот узору 1993 года з новай назвай банка: 100 мільёнаў, 1 мільярд, 10 мільярдаў дынараў.
1 кастрычніка 1993 года была праведзена дэнамінацыя дынара 1 000 000:1, адначасна з дэнамінацыяй югаслаўскага дынара. Пачаты выпуск банкнот новай серыі ўзору 1993 года. На ўсіх банкнотах гэтага выпуску быў намаляваны партрэт Петара Кочыча. Выпушчаны банкноты ў 5000, 50 000, 100 000, 1 мільён, 5 мільёнаў, 100 мільёнаў, 500 мільёнаў, 10 мільярдаў, 50 мільярдаў дынараў[1].
24 студзеня 1994 года ў Югаславіі ўведзены «новы дынар», курс якога быў прымацаваны да нямецкай марцы. «Пратаколам пра адзінства грашовага звароту Саюзнай Рэспублікі Югаславія, Рэспублікі Сербскай і Рэспублікі Сербская Краіна» ад 15 лютага 1994 года ўсталёўвалася, што новы дынар з’яўляецца іх адзінай грашовай адзінкай. Выпуск дынара Рэспублікі Сербскай быў спынены.
У 1998 годзе ў адпаведнасці з Дэйтанскім пагадненнем у Рэспубліцы Сербскай уведзена ў зварот баснійская канвертоўная марка.