Джон Філіп Суза (англ.: John Philip Sousa; 6 лістапада 1854, Вашынгтон — 6 сакавіка 1932, Рэдынг, штат Пенсільванія) — амерыканскі кампазітар і дырыжор духавых аркестраў, аўтар знакамітага маршу «The Stars and Stripes Forever», які стаў нацыянальным маршам ЗША. Суза ўвайшоў у гісторыю амерыканскай музыкі як «кароль маршаў».
Найбольш вядомая частка творчай спадчыны Сузы — маршы для духавога аркестра, яму належаць 136 твораў у гэтым жанры. Маршы Сузы разнастайныя па характары, але ўсе яны адзначаны аптымізмам і жыццёвай энергіяй. Сярод іх — «Зоркі і поласы назаўжды» (Stars and Stripes Forever; цяпер нацыянальны марш ЗША), Semper Fidelis (які стаў неафіцыйным гімнам амерыканскай Марской пяхоты) і многія іншыя. Суза напісаў таксама 15 аперэт, блізкіх па стылі да работ Гілберта і Салівана, каля сямідзесяці песень і шэраг твораў для духавога аркестра.