wd wp Пошук: ⬜

Густаў фон Альвенслебен

У Вікіпедыі ёсць артыкулы пра іншых людзей з імем Альвенслебен. Густаў фон Альвенслебен (ням.: Gustav von Alvensleben; 30 верасня 1803 — 30 чэрвеня 1881) — прускі генерал. Брат Канстанціна фон Альвенслебена.

Біяграфія

Густаў фон Альвенслебен нарадзіўся 30 верасня 1803 года ў Айхенбарлебене, адукацыю атрымаў у Берлінскім кадэцкім корпусе і ў 1821 годзе быў выпушчаны ў армію лейтэнантам.

У 1841 годзе быў узведзены ў капітаны і ў 1847 годзе — у маёры з пераводам у Генеральны штаб. З 1850 года займаў пасаду начальніка штаба 7-га армейскага корпуса, з 1855 года — палкоўнік і з 1858 года — генерал-маёр, у 1861 годзе прызначаны генерал-ад’ютантам прускага караля.

У 1863 годзе, з пачаткам паўстання ў Польшчы, Літве і Беларусі, Альвенслебен быў камандзіраваны ў Санкт-Пецярбург, дзе склаў канвенцыю з князем А. М. Гарчаковым, у якой рускім войскам дазвалялася пераходзіць прускую граніцу для праследавання паўстанцаў; аднак гэта канвенцыя не была ратыфікавана.

У 1865 годзе Густаў фон Альвенслебен быў узведзены ў генерал-лейтэнанты. Ён прымаў дзейны ўдзел у рэарганізацыі прускай арміі перад пачаткам эпохі войнаў за аб’яднанне Германіі і прыняў удзел у войнах з Аўстрыяй у 1866 годзе і Францыяй у 1870—1871 гадах.

У час першай з гэтых кампаній ён знаходзіўся пры галоўнай кватэры, дзе з’яўляўся праціўнікам Мольтке ў яго стратэгічных планах, у час другой — камандаваў 4-м армейскім корпусам, з якім адрозніўся пры Бамоне, пад Седанам і Парыжам. 27 снежня 1870 года расійскі імператар Аляксандр II падараваў Альвенслебену ордэн Святога Георгія 4-й ступені

У адплату выдатнай адвагі і ваенных подзвігаў, аказаных у час ваенных дзеянняў у Францыі.

Густаў фон Альвенслебен памёр 30 чэрвеня 1881 года ў Гернродэ.

Сярод іншых узнагарод Альвенслебен меў ордэн «Pour le Mérite».

Зноскі

1 2 Gustav Graf von Alvensleben Erxleben // Encyclopædia Britannica Праверана 9 кастрычніка 2017.

Крыніцы

Альвенслебены, фон // Алжирские экспедиции — Аракчеев, граф, Алексей Андреевич. — СПб. ; [М.] : Тип. т-ва И. В. Сытина(руск.) бел., 1911. — С. 355—356. — (Военная энциклопедия(руск.) бел. : [в 18 т.] / под ред. В. Ф. Новицкого(руск.) бел. [и др.]; 1911—1915).

Літаратура

Alvensleben, Gustav von // Allgemeine Deutsche Biographie.