Галаці́часк (Голотическ) — сярэдневяковы горад, верагодна, Полацкай зямлі.
Упершыню ўзгадваецца ў Аповесці мінулых гадоў пад 1071 годам у кантэксце вайны Усяслава Брачыславіча з Яраславічамі: «Победи Ярополк Всеслава у Голотичьска».
Галацічаск таксама названы сярод літоўскіх гарадоў у «Спісе рускіх гарадоў далёкіх і блізкіх», які звычайна датуюць канцом XIV — пачаткам XV ст. Пры гэтым прынамсі некаторыя звесткі гэтага спіса не незалежныя, а перанесеныя з ранейшых летапісаў.[1]
Назва верагодна паходзіць ад гідроніма. Месцазнаходжанне Галацічаска дагэтуль не ўстаноўлена. Даследчыкі традыцыйна звязваюць горад з тэрыторыяй Полацкай зямлі. Паколькі Яраполк у той час быў князем мінскім, а Усяслаў ішоў супраць яго, найбольш слушна шукаць Галацічаск недзе каля Мінска — прапануюць сённяшні Голацк. Але спробы атаясаміць Галацічаск з Голацкам ці некаторымі іншымі сучаснымі геаграфічнымі аб’ектамі Беларусі не знайшлі археалагічнага пацвярджэння.