Гаграўскі хрыбет[1] — горны хрыбет у Абхазіі, на паўднёвых схілах Вялікага Каўказа, размешчаны паміж рэкамі Псоў і Бзыб. Вышэйшы пункт — гара Агепста (3256 м). Адгор’е хрыбта каля горада Гагра ўшчыльную падыходзіць да Чорнага мора. Складзены пераважна вапнякамі, якія праразаюць рэкі Жвава-Квара, Юпшара і інш., утвараюць глыбокія каньёнападобныя даліны; развітыя карставыя з’явы. Схілы пакрытыя шыракалістымі і іглічнымі лясамі, вышэй — субальпійскія і альпійскія лугі. Па далінах рэк Бзыб, Юпшара і Гега ўздоўж хрыбта праходзіць аўтамабільная дарога да возера Рыца.