Вальтэр Косель (ням.: Walther Kossel; 4 студзеня 1888, Берлін — 22 мая 1956, Цюбінген) — нямецкі фізік. Сын А.Коселя.
Скончыў Гайдэльбергскі ўніверсітэт (1911). Прафесар Кільскага ўніверсітэта (з 1921) і Вышэйшай тэхнічнай школы ў Данцыгу (з 1932). З 1947 дырэктар Фізічнага інстытута ў Цюбінгене.
У 1916 годзе высунуў гіпотэзу, якая легла ў аснову тэорыі іоннай хімічнай сувязі і гетэравалентнасці. У 1928 годзе адначасова з нямецкім фізікам І. Н. Странскім прапанаваў малекулярна-кінетычную тэорыю росту крышталёў. Выявіў эфект узнікнення дыфракцыйных ліній пры дыфракцыі разыходнага пучка рэнтгенаўскіх прамянёў у крышталі (лініі Коселя).