Бенька, сапр. Святла́на Ва́цлаваўна Бень (нар. 20 чэрвеня 1975, Віцебск, Беларуская ССР) — беларуская музыка, спявачка, тэатральны рэжысёр, акцёрка, паэтка. Называе сябе найперш паэтам[1]. Шматгадовы лідар гурта «Серебряная свадьба».
Нарадзілася ў сям’і медыцынскіх работнікаў.[2].
Пастаноўшчыца некалькіх спектакляў у віцебскім лялечным тэатры «Лялька». Рэжысёр Беларускага дзяржаўнага тэатру лялек («Пэпі Доўгаяпанчоха», «Жудасны спадар Ау», «Хатні вожык», Vermes («Чарвякі») і іншыя)[3]. Стваральніца лялечнага тэатра «Картонка».
З 2005 — лідар фрык-кабарэ-бэнда «Серебряная свадьба», з якім дала мноства канцэртаў у розных краінах свету і запісала некалькі альбомаў. Альбом «Сердечная мускулатура» (2011) атрымаў найвышэйшыя адзнакі экспертаў Experty.by.[4] З 2016 года, калі гурт «Серебряная свадьба» сышоў у «бестэрміновы адпачынак»[5], шмат часу аддае тэатральным праектам, такім як «Из жизни насекомых»[6] (спектакль паводле твораў Мікалая Алейнікава). Выступае ў складзе «Мікракабарэ» з Арцёмам Залескім[7]. У 2017 годзе музыкі ўзялі ўдзел у праекце «(Не)расстраляная паэзія», запісаўшы кампазіцыю на вершы Ізі Харыка[1][8].
У 2020 годзе Бенька не раз выступала на нефармальных «дваровых» канцэртах у розных раёнах Мінска — з гуртом «Разбітае сэрца пацана» і з іншымі музыкамі[9].