У Вікіпедыі ёсць артыкулы пра іншых асоб з прозвішчам Чарвякоў. Аляксандр Віктаравіч Чарвякоў (нар. 1966, в. Бабінічы, Аршанскі раён, Віцебская вобласць) — беларускі дзяржаўны дзеяч, міністр эканомікі Рэспублікі Беларусь (з 2020).
Нарадзіўся ў 1966 годзе ў в. Бабінічы Аршанскага раёна Віцебскай вобласці. Бацька Віктар працаваў кінамеханікам, маці Раіса Нікіфараўна (пам. 2018) працавала бухгалтарам на мясцовай сельгасхіміі. Мае сястру Ларысу[1].
У 1988 годзе скончыў Беларускую дзяржаўную сельскагаспадарчую акадэмію ў г. Горкі. У 1988—1991 гадах — інжынер, вядучы інжынер-механік саўгаскамбіната «Юбілейны» Аршанскага раёна. У 1991—1994 гадах вучыўся ў аспірантуры БДСГА.
Кандыдат тэхнічных навук (1996), дацэнт (2001). У 1994—2010 гадах — асістэнт, выкладчык, старэйшы выкладчык, дацэнт, дактарант кафедры механізацыі жывёлагадоўлі і электрыфікацыі сельскагаспадарчай вытворчасці БДСГА.
У 2010—2017 гадах дырэктар НДЭІ Мінэканомікі Рэспублікі Беларусь.
Са студзеня 2017 года — намеснік Міністра эканомікі Рэспублікі Беларусь. З лістапада 2018 года — Першы намеснік Міністра эканомікі Рэспублікі Беларусь.
4 студзеня 2020 года прызначаны Міністрам эканомікі Рэспублікі Беларусь.
Аўтар і суаўтар 7 манаграфій, навучальных і даведачных дапаможнікаў, звыш 90 навуковых прац і 4 вынаходак.
Узнагарожданы медалём «За працоўныя заслугі» (2021)[2], падзякай Прэзідэнта Рэспублікі Беларусь, ганаровай граматай Савета Міністраў Рэспублікі Беларусь.
У шлюбе. Жонка Святлана працуе намеснікам галоўнага інжынера па навуцы ў праектным інстытуце Белдзіпразем. У шлюбе маюць дзвюх дочак Яўгенію і Лізавету. Яўгенія з’яўляецца суіскальніцай аддзела планавання і рэгулявання развіцця сельскай і лясной гаспадарак НДЭІ Міністэрства эканомікі. Лізавета скончыла Інстытут кіравання і сацыяльных тэхналогій пры БДУ[1].